Psalms 59

Amharic Tigrinya (መፅሓፍ ቅዱስ) No Year

1ኦ ኣምላኸይ፥ ካብ ፀላእተይ ኣድሕነኒ፤ ኣብ ልዕለይ ካብ ዝተስኡውን ኣናግፈኒ።

2ካብ ገበርቲ ኽፉእ ኣድሕነኒ፤ ካብ ናይ ደም ሰባት ኣድሕነኒ።

3እንሆ፥ ንነፍሰይ ይሃድንዋ ኣለዉ፤ ሓያላትውን ኣብ ልዕለይ ተኣከቡ፤ ኦ ጐይታ፥ ብበደለይ ኣይኮነን፤ ብሓጢኣተይውን ኣይኮነን።

4ብዘይ በደል ጐየኹ፤ ተዳለኹውን፤ ተስእ፤ ተቐበለኒ፤ ረአውን።

5ንስኻውን ኦ ጐይታ፥ ኣምላኽ ሓያላት፥ ኣምላኽ እስራኤል፥ ንዅሎም ኣህዛብ ክትምልከቶም ተልዓል፤ ዓመፅ ንዝገብሩ ዅሎም ኣይትምሓሮም።

6ምሸት ይመለሱ፤ ከም ኣኽላባት ድማ ይጥመዩ፤ ኣብ ከተማ ኸዓ ይዙሩ።

7እንሆ ብኣፋቶም ኣስሚዖም ይናገሩ ኣለዉ፤ ሰይፊ ኣብ ከንፈሮም ኣሎ፤ “መንከ ኸይሰምዐና?” ድማ ይብሉ።

8ንስኻ ግና ኦ ጐይታ ትስሕቆም፤ ንዅሎም ኣህዛብውን ትንዕቖም።

9እግዚኣብሄር መፀግዕየይ እዩሞ፥ ንሓይለይ ናባኻ ኣዕቝቦ ኣለኹ።

10ሕያዋይነት ኣምላኸይ ይርከበኒ፤ ኣምላኸይ፥ ኣብ ፀላእተይ የርእየኒ።

11ሕግኻ ኸይርስዑስ ኣይትቕተሎም፤ ኦ ዋልታይ፥ ብሓይልኻ በትኖምን ኣውርዶምን።

12ስለ ሓጢኣት ኣፎም ስለ ቓል ከንፈሮም መርገምን ሓሰትን ስለ ዝናገሩ፥ ብትዕቢቶም ይፃወዱ።

13ብቝጥዓኻ ኣጥፍኣዮም፤ ከም ዘይርከቡ ጌርካ ድማ ኣጥፍኣዮም፤ ኣምላኽ ያእቆብውን ክሳዕ ወሰን ምድሪ ኸም ዝገዝእ ይፍለጡ።

14ምሸት ይመለሱ፤ ከም ኣኽላባትውን ይጥመዩ፤ ኣብ ከተማውን ይዙሩ።

15ንሳቶም ዝብላዕ ደልዮም ይዙሩ፤ እንተ ዘይፀገቡ ድማ የጕረምርሙ።

16ኣነ ግና ስለ ሓይልኻ ኽዝምር እየ፤ ብምሕረትካውን ንጉሆ ደስ ይብለኒ፤ ብመዓልቲ መከራይ መፀግዕየይን እምባይን ኴንካኒ ኢኻሞ።

17ኦ ኣምላኸይ፥ ንስኻ መፀግዕየይን ምሕረተይን ኢኻሞ፥ ኦ ረዳእየይ፥ ንኣኻ ንኣምላኸይ ክዝምር እየ።

← Chapter 58 Chapter 60 →