Psalms 52

Amharic Tigrinya (መፅሓፍ ቅዱስ) No Year

1ኣታ ሓያል፥ ስለ ምንታይ ብኽፉእ እትምካሕ? ንምንታይከ ዅልሻዕ እትዕምፅ?

2ኣንደበትካ ሓጢኣት ይሓስብ፤ ከም ዝተስሓለ መላፀ ጥበራ ገበርካ።

3ካብ ፅቡቕ ንኽፍኣት፥ ፅድቂ ኻብ ምዝራብውን ንዓመፅ ፈተኻ።

4ንዅሉ ዘጥፍእ ቃልን፥ መልሓስ ጥበራን ፈተኻ።

5ስለዙይ እግዚኣብሄር ንሓዋሩ ኸፍርሰካ እዩ፤ ካብ ቤትካውን ክነቕለካ፥ ከፍልሰካውን እዩ፤ ሱርካውን ካብ ምድሪ ህያዋን ክነቕል እዩ።

6ፃድቃን ነዙይ ሪኦም ክፈርሑ እዮም፤ ብእኡ እናሰሓቑውን ከምዙይ ይብሉ፦

7“ንእግዚኣብሄር ሓጋዚኡ ዘይገበረ ኣብ ብዝሒ ሃብቱ ዝተኣመነ፥ ብኸንቱ ነገር ዝበርትዐ፥ እቲ ሰብ እቱይ እንሆ።”

8ኣነስ ኣብ ቤት እግዚኣብሄር ከም ዝለምለመ፥ ከም ኦም ኣውሊዕ እየ፤ ኣብ ምሕረት ኣምላኽ፥ ንዓለምን ንዘለኣለምን ተኣሚነ ኣለኹ።

9ጌርካለይ ኢኻሞ፥ ንዘለኣለም ከመስግነካ እየ፤ ኣብ ቅዱሳንካ ሰናይ እዩሞ፥ ንስምካ ተስፋ ኽገብር እየ።

← Chapter 51 Chapter 53 →