Psalms 44

Amharic Tigrinya (መፅሓፍ ቅዱስ) No Year

1ኦ ጐይታ፥ በእዛንና ሰማዕና፤ ኣቦታትናውን፥ እቲ ብዘመኖም፥ ብቐደም ዘመን ዝሰራሕኻዮ ስራሕ ነገሩና።

2ኢድካ ንኣህዛብ ኣጥፍአቶም፤ ንኣኣቶም ድማ ተኸልካ፤ ንኣህዛብ ኣሳቐኻዮም፤ ኣሳጐጕካዮምውን።

3ፈቲኻዮም ኢኻሞ፥ የማናይ ኢድካን ብርሃን ገፅካን እዩ እምበር፥ ብሰይፎም ንምድሪ ኣይወረሱን፤ ቅልፅሞምውን ኣየድሓኖምን፤

4ኣምላኸይን ንጉሰይን ንስኻ ኢኻ፤ ንያእቆብ መድሓኒት ኣዝዝ።

5ብኣኻ ንፀላእትና ኽንወግኦም ኢና፤ ብስምካውን ኣብ ልዕሌና ንዝቖሙ ነዋርዶም።

6ብቐስተይ ዝእመን ኣይኮንኩንሞ፤ ሰይፈይውን ኣየድሕነንን እዩሞ።

7ንስኻ ግና ኻብ ፀላእትና ኣድሓንካና፤ ነቶም ዝፀልኡናውን ኣሕፈርካዮም።

8ስለዙይ ዅሉ መዓልቲ ብእግዚኣብሄር ንኸብር፤ ንስምካውን ንዘለኣለም ነመስግን።

9ሕዚ ግና ፀላእኻናን ኣሕፈርካናን፤ ምስ ሰራዊትናውን ኣይትወፅእን።

10ካብ ቅድሚ ፀላእትና ንድሕሪት መለስካና፤ እቶም ዝፀልኡናውን ተማናጠሉና።

11ከም ኣባጊዕ ክበልዑና ኣሕሊፍካ ሃብካና፤ ናብ ኣህዛብ ድማ በተንካና።

12ንህዝብኻ ብዘይ ዋጋ ሃብካ፤ ብምልዋጦምውን ረብሓ የለን።

13ንጐረባብትና መፃረፊ፥ ኣብ ዙርያና ንዝነብሩ ኸዓ መስሓቕን መላገፂኦምን ገበርካና።

14ኣብ ኣህዛብ መመሰሊ፥ ኣብ ህዝብታት ድማ መነቕነቒ ርእሲ ገበርካና።

15ኵልሻዕ ውርደተይ ኣብ ቅድመይ እዩ፤ ካብ ቃል ዝፃረፍን ካብ ዘላግፅን ዝተልዓለ፥ ካብ ዝኸብብ ፀላኢውን ዝተልዓለ፥ ሕፍረት ገፀይ ሸፈነኒ።

17እዝ ኵሉ ኣብ ልዕሌና በፅሐ፥ ግና ኣይረሳዕናካን፤ ንኺዳንካውን ኣይዓመፅናን።

18ልብና ንድሕሪት ኣይተመለሰን፤ ኣሰርናውን ካብ መንገድኻ ኣይወፀን።

19ኣብ ክፉእ ስፍራ ኣዋሪድካና ኢኻሞ፤ ብፅላል ሞትውን ሰዊርካና ኢኻሞ።

20ስም ኣምላኽና፥ ረሲዕና እንተ ንኸውንስ፥ ኣእዳውናውን ናብ ካልእ ኣምላኽ ኣልዒልና እንተንኸውንስ፥

21እግዚኣብሄር ነዙይዶ ኣይምርምሮን ነይሩ? ንሱ ልቢ ዝሰወሮ ይፈልጥ እዩሞ።

22ንሕና ግና ምእንታኻ ዅልሻዕ ንቕተል ኣለና፤ ከም ዝሕረዱ ኣባጊዕውን ኮንና።

23ኦ ጐይታ! ተበራበር፤ ንምንታይከ ትድቅስ? ተስእ! ንሓዋሩውን ኣይትደርብየና!

24ንምንታይከ ገፅካ እትስውር? ንመከራናን ጭንቕናንከ ንምንታይ ትርስዕ?

25ነፍስና ኣብ ምድሪ ሓሲራ እያሞ፥ ከብድናውን ናብ ምድሪ ተጣቢቓ እያሞ።

26ኦ ጐይታ ተስእሞ ርድአና፤ ስለ ስምካ ተቤዘወና።

← Chapter 43 Chapter 45 →