Psalms 45

Amharic Tigrinya (መፅሓፍ ቅዱስ) No Year

1ልበይ ሰናይ ነገር ኣፈልፈለ፤ ኣነ ስራሐይ ንንጉስ እነግር፤ ልሳነይ ከም ብርዒ ቕልጡፍ ፀሓፊ እዩ።

2ፅባቐኻ ኻብ ደቂ ሰብ ይምልክዕ፤ ሞገስ ብኸናፍርካ ወሓዘ፤ ስለዙይ ኣምላኽ ንዘለኣለም ባረኸካ።

3ኣታ ሓያል ብክብርኻን ብግርማኻን፥ ሰይፍኻ ኣብ ሕቘኻ ዕጠቕ።

4ስለ ቕንዕናን ስለ የውሃትን ስለ ፅድቅን ኣቕንዕ፤ ተዳሎ ንገስውን፤ የማንካውን ብኽብሪ ኽመርሐካ እዩ።

5ኣታ ሓያል፥ ፍላፃታትካ ዝተስሓላ እየን፤ ንሳተን ኣብ ልቢ ፀላእቲ ንጉስ ይኣትዋ፤ ኣህዛብውን ኣብ ትሕቴኻ ይወድቁ።

6ኦ ኣምላኽ ዙፋንካ ንዘለኣለም እዩ፤ በትሪ መንግስትኻ በትሪ ቕንዕና እዩ።

7ንፅድቂ ፈተኻ፤ ንዓመፃ ድማ ፀላእኻ፤ ስለዙይ ሕልፊ ብፆትካ እግዚኣብሄር ኣምላኽካ ዘይቲ ሓጐስ ቀብአካ።

8ኣብ ኵሉ ኽዳውንትካ ኸርበን ዓልውን ዝባድን ኣሎ፤ ብስኒ ሓርማዝ ኣብ ዝተሰርሐ ኣዳራሽ፥ የሐጕሱኻ።

9ኣዋልድ ነገስታት ንኽብርኻ እየን፤ እታ ንግስቲ ክዳን ወርቂ ተጐናፂፋን ተጐልቢባን፥ ኣብ የማንካ ትቐውም።

10ኣቲ ጓለይ፥ ስምዒ፤ ረአዪ፤ እዝንኺ ኸዓ ፅን ኣብሊ፤ ህዝብኽን ቤት ኣቦኽን ረስዒ።

11ንጉስ ፅባቐኺ ፈትዩ እዩሞ፥ ንሱ ጐይታኺ እዩ እሞ።

12ኣዋልድ ጢሮስ ገፅ በረኸት ሒዘን ክሰግዳሉ እየን፤ ሃብታማት ህዝቢ ምድሪ ኣብ ቅድሜኺ ኽምህለሉ እዮም።

13ንጓል ንጉስ ሓሴቦን ኵሉ ኽብራ እዩ፤ ክዳውንታ ናይ ወርቂ መጐናፀፊ እዩ።

14ብድሕሪኣ ንንጉስ ደናግል ይወስዱሉ፤ ንብፆታውን ናባኻ የቕርቡ፤ ናብቲ ንጉስ የእትዉወን።

15ብሓጐስን ብዕልልታን ይወስድወን፤ ናብ ኣዳራሽ ንጉስውን የእትውወን።

16ክንዲ ኣቦታትኪ ውሉድ ተወለዱልኪ፤ ኣብ ኵሉ ምድሪ እውን ገዛእቲ ጌርኪ ኽትሸሚዮም ኢኺ።

17ንስምኪውን ንውሉድ ወለዶ ኸዘኻኽሩ እዮም፤ ስለዙይ ኦ ጐይታ፥ ኣህዛብ ንዘለኣለመ ኣለም ክግዝኡልካ እዮም።

← Chapter 44 Chapter 46 →