Psalms 29

Amharic Tigrinya (መፅሓፍ ቅዱስ) No Year

1ኣቱም ውሉድ ኣምላኽ፥ ንእግዚኣብሄር ኣምፅኡ፤ ክብርን ምስጋናን ንእግዚኣብሄር ኣምፅኡ።

2ናይ ስሙ ኽብሪ ንእግዚኣብሄር ኣምፅኡ፤ ኣብ ስፍራ ቅድስናኡ ንእግዚኣብሄር ስገዱ።

3ድምፂ እግዚኣብሄር ኣብ ልዕሊ ማያት እዩ፤ ኣምላኽ ክብሪ ኣንጐድጐደ፤ እግዚኣብሄር ኣብ ልዕሊ ብዙሕ ማያት እዩ።

4ድምፂ እግዚኣብሄር ብሓይሊ እዩ፤ ድምፂ እግዚኣብሄር ብዓብዪ ኽብሪ እዩ።

5ድምፂ እግዚኣብሄር ንዝግባታት ይሰብር፤ እግዚኣብሄር ንዝግባ ሊባኖስ ይቕጥቅጦ።

6ንሊባኖስ ከም ብተይ፥ ንስርዮን ግና ከም ሓደ ቐርኒ ዘለዎ ውሉድ ኣራዊት የዐንድሮም።

7ድምፂ እግዚኣብሄር ንነበልባል ሓዊ ይስንጥቖ።

8ድምፂ እግዚኣብሄር ንምድረ በዳ የናውፆ፤ እግዚኣብሄር ንምድረ በዳ ቃዴስ የናውፆ።

9ድምፂ እግዚኣብሄር ንዋልያታት የጠንክሮም፤ ንዱርውን ይገልፆ፤ ኵሉውን ኣብ መቕደሱ ምስጋና ይብል።

10እግዚኣብሄር ንጥፍኣት ማይ ይእክቦ፤ እግዚኣብሄር ንዘለኣለም ንጉስ ኮይኑ ይነብር።

11እግዚኣብሄር ንህዝቡ ሓይሊ ይህቦም፤ እግዚኣብሄር ንህዝቡ ብሰላም ይባርኾም።

← Chapter 28 Chapter 30 →