Psalms 28

Amharic Tigrinya (መፅሓፍ ቅዱስ) No Year

1ኦ ጐይታ፥ ናባኻ አእዊ ኣለኹ፤ እንተ ዘይመሊስካለይ፥ ከምቶም ናብ ጕድጓድ ዝወርዱ ኸይመስልስ፥ ኣታ ኣምላኸይ ስቕ ኣይትበለኒ።

2ኣእዳወይ ናብ መቕደስካ ዘርጊሐ፥ ናባኻ ኽምህለል እንተለኹ፥ ቃል ልመናይ ስማዕ።

3ምስ ሓጥኣንን ምስ ገበርቲ ኽፉእን ዓመፅትን፥ ንነፍሰይ ኣይትውሰዳ፤ ኣብ ልቦም ክፍኣት እናሃለወ፥ ምስ ብፆቶም ሰላም ምስ ዝዛረቡ ኣይትደርብየኒ።

4ከም ስራሖምን ከም ክፉእ ኣካይዳኦምን ሃቦም፤ ከም ተግባር ኣእዳዎም ሃቦም፤ ፍዳኦምውን ናብ ርእሶም ምለሰሎም።

5ንሳቶም ንስራሕ እግዚኣብሄርን ንተግባር ኣእዳዉን ኣይሓሰቡንሞ፥ ከፍርሶም እዩ እምበር ኣይሃንፆምን።

6ንቓል ልመናይ ሰሚዕዎ እዩ እሞ፥ እግዚኣብሄር ይመስገን።

7እግዚኣብሄር ሓይለይን ዋልታይን እዩ፤ ልበይ ብእኡ ኣመነ፤ ኣነውን ተረዳእኹ፤ ስጋይ ደስ ይብሎ፤ ፈቒደውን አመስግኖ።

8እግዚኣብሄር ንህዝቡ ሓይሎም እዩ፤ ነቲ ዝቐብኦውን ናይ ድሕነቱ መተኣማመኒ እዩ።

9ህዝብኻ ኣድሕን፤ ርስትኻውን ባርኽ፤ ሓልዎም፤ ንዘለኣለምውን ልዕል ልዕል ኣብሎም።

← Chapter 27 Chapter 29 →