Psalms 21

Amharic Tigrinya (መፅሓፍ ቅዱስ) No Year

1ኦ ጐይታ! ንጉስ ብሓይልኻ ደስ ይብሎ፤ ብምድሓንካውን የመና ደስ ይብሎ።

2ትምኒት ልቡ ሃብካዮ፤ ልመና ኸናፍሩውን ኣይከላእኻዮን።

3ብብዙሕ በረኸት በፃሕኻሉ፤ ብኽቡር ዕንቍ ዝኾነ ዘውዲ ኣብ ርእሱ ደፋእኻሉ።

4ህይወት ለመነካ፤ ንነዊሕ ዘመን ንዘለኣለም ሃብካዮ።

5ብምድሓንካ ኽብሩ ዓብዪ እዩ፤ ክብርን ምስጋናን ወሰኽካዮ።

6ዘለኣለማዊ በረኸትውን ሂብካዮ ኢኻሞ፥ ብሓጐስ ገፅካ ኣሐጐስካዮ።

7እቲ ንጉስ ብእግዚኣብሄር ተኣማሚኑ እዩ እሞ፥ ብልዑል ምሕረትውን ኣይናወፅን እዩ።

8ኢድካ ንዅሎም ፀላእትኻ ትርከቦም፤ የማነይቲኻውን ንዅሎም ዝፀልኡኻ ትራኸቦም።

9ምስ ተቘጣዕኻ ድማ ኸም ሓዊ እቶን ግበሮም፤ እግዚኣብሄር ብቝጥዓኡ ኸጥፍኦም እዩ፤ ሓዊ ድማ ኽበልዖም እዩ።

10ንፍረኦም ካብ ምድሪ፥ ንዘርኦም ድማ ኻብ ማእኸል ደቂ ሰብ ክተጥፍእ ኢኻ።

11ኣብ ልዕሌኻ ኽፍኣት ዘርጊሖም እዮምሞ፤ ዘይኽእሉዎ ምኽሪ ሓሰቡ።

12ንድሕሪት ትመልሶም፤ ቀስትኻ ናብ ገፆም ኣቢልካ ኽተዳሉ ኢኻ።

13ኦ ጐይታ፥ ብሓይልኻ ልዕል ልዕል በል! ንፅንዓትካውን ክነመስግንን ክንዝምርን ኢና።

← Chapter 20 Chapter 22 →