Psalms 111

Amharic Tigrinya (መፅሓፍ ቅዱስ) No Year

1ሃሌ ሉያ። ኦ ጐይታ፥ ኣብ ባይቶ ቕኑዓት ኣብ ማእኸል ጉባኤ፥ ብፍፁም ልበይ አመስግነካ ኣለኹ።

2ግብሪ እግዚኣብሄር ዓብዪ እዩ፤ ብዅሎም እቶም ዝሕጐሱላ ተደላዪት እያ።

3ስራሑ ምስጋናን ግርማን እዩ፤ ፅድቁ ኸዓ ንዘለኣለም ይነብር።

4ንተኣምራቱ መዘከርታ ገበረ፤ እግዚኣብሄር መሓርን ይቕረ በሃልን እዩ።

5ንዝፈርሕዎ ምግቢ ይህቦም፤ ንኪዳኑውን ንዘለኣለም ይዝክር።

6ርስቲ ኣህዛብ ምእንቲ ኽህቦም፥ ንህዝቡ ሓይሊ ግብሩ ኣርኣየ።

7ኵሉ ተግባር ኢዱ ሓቅን ፍርድን እዩ፤ ኵሉ ትእዛዛቱውን እሙን እዩ፤

8ንዘለኣለመ ኣለም ፀኒዑ ይነብር፤ ብሓቅን ብቕንዕናን ዝተሰርሐ እዩ።

9መድሓኒትውን ንህዝቡ ሰደደ፤ ኪዳኑውን ንዘለኣለም ኣዘዘ፤ ስሙ ቅዱስን ዝፍራሕን እዩ።

10ናይ ጥበብ መጀመርታ ንእግዚኣብሄር ምፍራሕ እዩ፤ ኵሎም እቶም ዝፍፅምዋ፥ ሰናይ ምስትውዓል ኣለዎም፤ ምስጋናኡውን ንዘለኣለም ይነብር።

← Chapter 110 Chapter 112 →