Proverbs 14

Amharic Tigrinya (መፅሓፍ ቅዱስ) No Year

1ለባም ሰበይቲ ቤታ ትሃንፅ፤ ዓሻ ግና በገዛ ኢዳ ተፍርሶ።

2ንእግዚኣብሄር ዝፈርሕ ብቕንዕና ይኸይድ፤ መንገዲ ዘቐይንን ግና ይንዕቖ።

3ኣብ ኣፍ ዓሻ በትሪ ትዕቢት ኣሎ፤ ለባማት ግና ብኸንፈሮም ይሕለዉ።

4ብዕራይ ኣብ ዘይብሉ ቦታ እኽሊ ኣይርከብን፤ ብዙሕ ሲሳይ ግና ብሓይሊ ብዕራይ እዩ።

5እሙን ምስክር ኣይሕሱን፤ ሓሳዊ ምስክር ግና ሓሰት እዩ ዝዛረብ።

6መላገፂ ሰብ ንጥበብ ይደልያ እሞ ኣይረኽባን፤ ንለባም ግና ፍልጠት ምርካብ ኣየሸግሮን።

7ካብ ቅድሚ ዓሻ ረሓቕ፤ ካብኡ ኸንፈር ፍልጠት ኣይትረክብን ኢኻ።

8ናይ ለባም ጥበብ፥ መንገዱ ምስትብሃሉ እዩ፤ ናይ ዓሻ ዕሽነት ግና፥ ጥበራ እዩ።

9ዓያሹ ብሓጢኣት የላግፁ፤ ኣብ ማእኸል ቅኑዓት ግና ሕያዋይነት ኣሎ።

10ልቢ ንምረቱ ባዕሉ ይፈልጦ፤ ኣብ ሓጐሱ ኸዓ ኻልእ ኣይሕወስን።

11ቤት ክፉኣት ይዓኑ፤ ድንኳን ቅኑዓት ግና ይፀንዕ።

12ንሰብ ቅንዕቲ እትመስሎ መንገዲ ኣላ፤ መወዳእታኣ ግና መንገዲ ሞት እዩ።

13እናሰሓቕካውን፥ ልቢ ይጕሂ እዩ፤ መወዳእታ ሓጐስ ከዓ ሓዘን እዩ።

14ንልቡ ኻብ ፅድቂ ዝመልስ ሰብ፥ ካብ ፍረ መንገዱ ይፀግብ፤ ፃድቕ ሰብ ግና ኻብ ባዕሉ እዩ።

15ገርሂ ሰብ ንዅሉ ቓል ይኣምን፤ ለባም ግና ነካይዳኡ ይጥንቀቕ።

16ለባም ሰብ ይፈርሕ፤ ካብ ክፉእ ድማ ይርሕቕ፤ ሰነፍ ግና ደፋርን ኣማኒ ርእሱን እዩ።

17ቍጡዕ ሰብ ስራሕ ዕሽነት ይሰርሕ፤ መስተውዓሊ ግና ይዕገስ።

18ደናቝር ዕሽነት ይወርሱ፤ ለባማት ግና ዘውዲ ፍልጠት ይደፍኡ።

19ዓመፅቲ ሰባት ኣብ ቅድሚ ሕያዎት፥ ሓጥኣን ድማ ኣብ ኣፍ ደገ ፃድቃን ይንብርከኹ።

20ንድኻ ብፃዩ እኳ ይፀልኦ፤ ፈተውቲ ሃብታም ግና ብዙሓት እዮም።

21እቲ ንብፃዩ ዝንዕቕ ሓጢኣት ይገብር፤ ዝርህርሀሉ ግና ቡሩኽ እዩ።

22ክፉእ ዝሓስቡ ይጋገዩ፤ ምሕረትን ሓቅን ግና ነቶም ሰናይ ዝሓስቡ እየን።

23ብስራሕ፥ ኵሉ ሃፍቲ ይርከብ፤ ብዙሕ ዘረባ ዝዛረባ ኸናፍር ግና ናብ ስእነት የብፅሓ።

24ሃብቲ ንጠቢባን ዘውዶም እዩ፤ ዕሽነት እቶም ዓያሹ ግና ዅልሻዕ ዕሽነት እዩ።

25ሓቀኛ ምስክር ህይወት የድሕን፤ ሓሳዊ ምስክር ግና ጠባሪ እዩ።

26ንእግዚኣብሄር ዝፈርሕ ሰብ ፅኑዕ እምባ ኣለዎ፤ ንደቁውን መዕቘቢ ይረክብ።

27ንእግዚኣብሄር ምፍራሕ ናይ ህይወት ፍልፍል እዩ፤ ንሰብ ከዓ ኻብ መፃወዲያ ሞት የድሕኖ።

28ክብሪ ንጉስ ኣብ ብዝሒ ህዝቢ እዩ፤ ምውሓድ ህዝቢ ግና ጥፍኣት ገዛኢ እዩ።

29ንዕጉስ ሰብ ብዙሕ ምስትውዓል ኣለዎ፤ ቍጡዕ ግና ንዕሽነቱ ይገልፃ።

30ትሑት ልቢ፥ ንስጋ ህይወቱ እዩ፤ ቅንኢ ግና፥ ቍንቍነ ኣዕፅምቲ እዩ።

31ንድኻ ዝጭቍን ንፈጣሪኡ ይደፍር፤ ንስኡን ዝርህርህ ግና ንፈጣሪኡ የኽብር።

32ሓጥእ ብኽፍኣቱ ይግምጠል፤ ፃድቕ ግና እንተ ሞተ እኳ መዕቘቢ ኣለዎ።

33ጥበብ ኣብ ልቢ መስተውዓሊ ትሓድር፤ ኣብ ልቢ ዓያሹ ግና ኣይትፍለጥን።

34ፅድቂ ንህዝቢ ልዕል የብሎ፤ ሓጢኣት ግና ውርደት ህዝቢ እዩ።

35ብልሂ ሓሽከር ኣብ ቅድሚ ንጉስ ሞገስ ይረክብ፤ ነውሪ ኣብ ልዕሊ ዝገብር ሓሽከር ግና ቝጥዓ ንጉስ ይወርድ።

← Chapter 13 Chapter 15 →