Psalms 88

Amharic Gofa GFBLVF (Geeshsha Maxaafa)

1Godaw, tana ashshiya Xoossaw, taani gallas neeko waassayis; qamma ne sinthan yeekayis.

2Ta woosay ne sinthe gako; ne haythay ta waasuwa si7o.

3Ta shempoy meto kallida gisho, ta de7oy duufoko matis.

4Duufo geliya asaara taybetas; wolqi bayna asi gidas.

5Taani ahata giddon yegetida asa mela; hayqidi duufon zin7ida asa mela. Hizape neeni hassayonna asinne neepe duuxida asa mela gidas.

6Neeni tana ciimmon, dhuma ollan yeggadasa.

7Ne hanqoy tana deexees; ne hanquwa beetay tana muukis.

8Neeni ta dabbota taape haassadasa; enti tana shaatettana mela oothadasa. Tana teqidosona; kessa ekanaw danda7ike.

9Godaw, azzanon ta ayfey teljumis; Ubba gallas taani neeko waassayis; ta kushiya neeko miccas.

10Hayqidaysatas ne malaalsiyaba oothayee? Enti dendidi nena galatonayee?

11Merinaa ne siiqoy duufon, ne ammanetethay dhayo bessan odetiyee?

12Ne malaalsiya oosoy dhuman, ne xillotethay dogetida biittan eretiyee?

13Godaw, ta neeko waassayis; wonta wonta ta woosay ne sinthe gakees.

14Godaw, ne tana ayis ixay? Ne som7uwa taape ayis genthay?

15Na7atethafe doomada taani un7etas; hayqos matas; ne tana daganthin ufaysi qanxas.

16Ne suulliya hanqoy ta bolla uushis; ne daganthoy tana dhaysis.

17Enti gallas kumethi di7oda tana teqidosona; issife shiiqidi tana oykidosona.

18Ta laggetanne taw mata asata taape haassadasa; taw dabboy dhuma xalaala.

← Chapter 87 Chapter 89 →