bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Amharic
/
Amharic Gofa GFBLVF (Geeshsha Maxaafa)
/
Psalms 78
Psalms 78
Amharic Gofa GFBLVF (Geeshsha Maxaafa)
1
Ta asaw, ta timirtiya si7ite; ta doonape keyiya qaala hayzidi si7ite.
2
Taani ta doona leemison dooyana; benipe geemmida xuura qoncisana.
3
Nuuni si7idaysanne eridaysa, nu aawati nuus odidaysata odana.
4
Hessata nuuni enta naytape qosoko; Godaas bessiya galataa, iya wolqaanne malaalsiya iya oosuwa, yaana yeletas odana.
5
I Yayqooba zerethaas kiitaa, Isra7eele asaas higgiya immis. Kase nu aawati banta nayta he higgiya tamaarsana mela kiittis.
6
Kaalliya yeletay hessa erana mela, enta naytika banta naytas buroo yeletana naytas erisanaasa.
7
He wode enti Xoossan ammanetena; I oothidaba balokona; iya kiitaa naagana.
8
Enti kase banta aawatada wozana muume yeleta, geellanne ammanetona yeleta, Xoossan minnidi eqenna yeleta gidokona.
9
Efreema asay donge dancikoka, ola gallas guye simmidosona.
10
Enti Xoossaa caaquwa naagibookona; iya higgiyan hemetonna ixidosona.
11
Enti I oothida oosuwanne I bessida malaata dogidosona.
12
I enta aawata sinthan Gibxe biittan, Xo7aane Denban malaata oothis.
13
Abbaa shaakidi giddora enta pinthis; haatha shaakidi yan han godada essis.
14
I enta gallas shaaran, qamma tama poo7on kaalethis.
15
I mela biittan zaalla phalqidi, abbada daro haathi enta ushshis.
16
Zaallafe haathe pultisidi, shaafa haathada gogisis.
17
Shin enti iya bolla nagara gujidi oothidosona; Ubbaafe Dhoqa Xoossaa bolla mela biittan makallidosona.
18
Banta amotida kathaa oychidi, Xoossaa erishe paacidosona.
19
Enti Xoossaa bolla haysada yaagidi haasayidosona; “Mela biittan Xoossay nuus kathi giigisanaw danda7ii?
20
Zaalla shocin pultoy keyidi shaafa haathi goggis; shin I nuus kathi immanaw danda7ii? Woyko ba asaas asho immanaw danda7ii?” yaagidosona.
21
Goday hessa si7ida wode daro hanqetis; Yayqooba kochata bolla tami eexis; Isra7eele bolla iya hanqoy daris.
22
Hessika enti Xoossan ammanibookona; woyko iya ashuwan ammanetibokona.
23
Gidoshin, dhoqa saluwa kiittis; salo pengiya dooyis.
24
Enta muzanaw manna bukisis; salo kathaa entaw immis.
25
Kiitanchota kathi asay mis; Xoossay entaw miyaba darsidi immis.
26
Doloha carkoy carkana mela oothis; ba wolqan dugeha carkuwa denthis.
27
I asaas asho biitta kessis; paalliya kafota abba gaxa shafeda bukisis.
28
Enti de7iya bessan, dunkaaniya yuushon wodhisis.
29
Enti amotidaysa entaw immis; midi banta ganjiya gathidosona.
30
Shin enti banta amuwa aathona de7ishin, ashoy enta doonan buroo de7ishin,
31
Xoossaa hanqoy enta bolla wodhis; enta giddofe wolqaama asata wodhis; Isra7eelepe na7atethata dhukis.
32
He ubbay haninka nagara ooso aggibokona; daro malaata oothinka ammanibookona.
33
Hessa gisho, I enta gallasata hada oothis; enta laythata dagaman ongis.
34
Xoossay entafe baggaa wodhiya wode iya koydosona, banta nagaraa paaxidi iyako simmidosona.
35
Xoossay enta zaalla gideysa, Ubbaafe Dhoqa Xoossay enta wozeysa, gideysa hassayidosona.
36
Shin enti banta inxarsan wordotidosona; banta doonan cimmidosona.
37
Enta wozanay Xoossan minnidi eqenna; iya caaquwas ammanetokona.
38
Shin I enta maaris enta nagaraa atto gis; enta dhaysibeenna. Daro wode ba hanquwa teqis; ba gaduwa kumethi enta bolla yeddibeenna.
39
Enti hayqiya asho gideysanne keyidi simmonna shempo gideysa akeekis.
40
Enti mela biittan iya bolla aapun toho makallidona! Mela biittan iya aapun toho lancisidonaa!
41
Enti zaari zaaridi Xoossaa paacidosona; Isra7eele Geeshshaa yiloyidosona.
42
Entana morketa kushepe ashshida gallasaa, un7ethiya asaape wozida wolqaa dogidosona.
43
I Gibxen oothida malaata, Xo7aane Denban oothida malaalsiya oosuwa hassaybookona.
44
Enta shaafa haathata suuthu laammis; hessa gisho, Gibxe asay shaafatape uyanaw danda7ibookona.
45
Enta waaysiya udunxetanne enta biitta dhaysiya shodheta kiittis.
46
Dolida kathaa duggos, enti daaburida ayfiya booles immis.
47
Enta woyniya shachan, enta balasiya carkon dhaysis.
48
Enta meheta shachan wodhis; enta dorsata dadan wursis.
49
Dhaysiya kiitancho cugara, ba suulliya hanquwa, yiluwa, ixuwanne gaduwa enta bolla yeddis.
50
Ba hanquwas oge giigisis; enta dhayos aathidi immis; enta hayqope ashshibeenna.
51
Gibxe bayra nayta ubbaa shocis; Kaama dunkaanen koyro nayta wodhis;
52
Shin ba asaa dorsada kessis; wudeda mela biittan heemmis.
53
I enta saro kaalethida gisho babibookona; shin enta morketa abbay mittis.
54
I enta ba geeshsha biitta, ba ushacha kushen xoonidi oykida zuma bolla ehis.
55
I enta sinthafe kawotethata gooddis; enta biitta Isra7eele kochatas laata oothidi shaakis; ba asaas enta keethaa immis.
56
Gidoshin, Ubbaafe Dhoqa Xoossaa bolla makallidosona; iya paacidosona; iya higgiya kiitetibookona.
57
Enti banta aawatada geellatanne minnidi eqonna asi gididosona; wobe toorada wora wodhidosona.
58
Dhoqa goyinno bessatan iya yiloyidosona; banta eeqatara iya qanaatisidosona.
59
Xoossay hessa si7ida wode shenetis; Isra7eele ubbaa kadhis.
60
Seelon I de7iya ba bessaa, asaa giddon I de7iya ba dunkaaniya aggis.
61
Xoossa wolqaasinne bonchuwas malaata gidida Taabotiya morketa kushen aathidi immis.
62
I ba asaa bolla shenetis; enta mashshas aathidi immis.
63
Na7atethati ubbay taman meetetidosona; geela7oti azina gelonna attidosona.
64
Enta kahineti mashshan wuridosona; enta macheti yeekonna mela digetidosona.
65
Goday dhiskofe barkiya asada dendis; woyne ushsha mathoy aadhida asada hanis.
66
I ba morketa guye zaaridi shocis; enta merinaw yeellayis.
67
Yoosefa dunkaaniya kadhis; Efreema kochaa dooribeenna.
68
Shin Yihuda kochaanne I dosiya Xiyoone deriya dooris.
69
Ba keethaa saloda dhoqu oothidi keexis; sa7ada merinaw essis.
70
Ba aylliya Dawita dooridi, dorse heemmiya bessaafe ekis.
71
Dorse heemmiya bessafe denthidi, ba asaa Yayqooba, ba laata Isra7eele henthanaw ehis.
72
Dawiti enta suure wozanan heemmis; ba cincatethan kaalethis.
← Chapter 77
Chapter 79 →