Psalms 79

Amharic Gofa GFBLVF (Geeshsha Maxaafa)

1Xoossaw, ayhude gidonna asay, ne biitta bolla dendidosona; Ne geeshsha keethaa tunisidosona; Yerusalaame laallidosona.

2Ne aylleta aha salo kafotas, ne geeshshata ashuwa sa7a do7atas immidosona.

3Enta suuthaa Yerusalaame yuushon haathada gussidosona; enta aha moogiya asi dhayis.

4Nu shoorotas nuuni miichas, nu heeran de7iya asaas qelqisethas attida.

5Godaw, hessi awude gakanaw hananee? Neeni nu bolla merinaw hanqetadii? Ne hanqoy tamada eexishe daaneyee?

6Nena eronna dereta bolla, ne sunthaa xeegonna kawotethata bolla ne hanquwa zaara.

7Hessika enti Yayqooba mida gishonne enti de7iya bessaa dhaysida gishosa.

8Nuuni daro metootida gisho, nu mayzata iitatethaa nu bolla taybopa; eeson ne maarota nuus kiitta.

9Abeeti nuna ashshiya Xoossaw, ne boncho sunthaa gisho nuna maadda. Ne suntha gisho nuna ashsha; nu nagaraa atto ga.

10Dereti, “Enta Xoossay awun de7ii?” ayis gaanee? Ne aylleta suuthaa enti gussida gisho; neeni halo keyeysa nu xeellishin, enta giddon qoncisa.

11Qasho asaa ooley ne sinthe gako; hayqo pirdetidaysata ne wolqaa gitatethan ashsha.

12Godaw, nu shooroti nena toochida gisho, laapun kushe halo keyada enta ki7on idintha.

13He wode nuuni ne asay, ne dorsati, merinaw nena galatana. Yeletethaafe yeletethaa gakanaw, ne peeshsha odana.

← Chapter 78 Chapter 80 →