Psalms 77

Amharic Gofa GFBLVF (Geeshsha Maxaafa)

1Taani Xoossaa maggannayis; tana si7a gada iyako waassayis.

2Ta metuwa gallasan Godaa koyas; qamma kumethi shempoy bayna ta kushiya miccas; gidoshin, ta shempiya minnanaw danda7abuku.

3Taani Xoossaba qopiya wode oolayis; taani wotha denthida wode ta shempoy daaburees.

4Qamma kumethi tana dhisko diggada aysadasa; ta un7etida gisho odetanaw danda7abike.

5Taani aadhida gallasata qopas; kase laythata hassayas.

6Taani qamma gita qofan aqas; ta wozanan wotha denthashe, haysada yaagada tana oychas;

7“Xoossay nuna merinaw aggideyee? hizape guye I nuus keeheneyee?

8Iya siiqoy attideyee? I odida qaala merinaw poleneyee?

9Xoossay ba maarota dogideyee? Ba qadhiya hanqon laammideyee?” yaagada oychas.

10Ubbaafe Dhoqa Xoossaw, tana un7ethiday, ne ushacha kushiyan nuna maado aggidaysa.

11Godaa oosota taani qopana; I beni oothida malaalsiya oosota hassayana.

12Ne oosota taani zaara zaarada qopana; ne wolqaama oosota taani wotha denthana.

13Abeeti Xoossaw, ne ogey geeshshi; ne mela gita Xoossi oonee?

14Neeni malaalsiyaba oothiya Xoossaa; asaa giddon ne wolqaa qoncisaasa.

15Ne asaa, Yayqoobanne Yoosefa kochaa ne qesiyan wozadasa.

16Abeeti Xoossaw, haathati nena be7idi yayyidosona; abba ciimmotika kokoridosona.

17Shaarati haathe duge tigidosona; daday salon guummis; ne wol7anthay yan han wol7amis.

18Ne dadaa guunthay uushuwa giddon guummis; ne wol7anthay sa7aa poo7isis; biittay qaaxis; kokoris.

19Neeni abba giddora hemetaasa; ciimmo abba giddora kanthaasa; shin ne tohoy yedhida bessay bentenna.

20Muse kushennine Aarona kushen ne asaa dorsa wudeda kaalethadasa.

← Chapter 76 Chapter 78 →