Proverbs 25

Amharic Gofa GFBLVF (Geeshsha Maxaafa)

1Haysati Yihuda kawa Hizqiyaasa asati duuqidi xaafida Solomone leemisota.

2Xuura genthoy Xoossas boncho; xuura pilgidi kesoy kawotas boncho.

3Saloy dhoqu gidaysadanne sa7i ziqa gididaysada kawota qofaa asi eranaw danda7enna.

4Birape qita digga; hessafe guye, hiillanchoy loythana.

5Kawo sinthafe iita asata digga; iya araatay xillotethan minnidi eqana.

6Kawo sinthan eqiya wode ceeqetofa; gita asata giddon new besse koyopa.

7Neepe gitatiya asas besse immanaw halaqay nena denthin, kawuyeysafe, I nena, “Ha dhoqa bessan utta” geysi lo77o.

8Ne ayfen be7idaba markatanaw daynna sinthe baanaw ellesopa. Ne markata simmin hara asi ne markatethay bala gideysa qoncisiko, ne yeellatana.

9Ne giddoninne ne shooruwa giddon palami medhetiko, iyara odetada ne palama wursa; hara asa xuura qoncisopa.

10Hessi hanonna ixiko ne odeysa si7ida asi nena kawushana; ne sunthay zaaridi simmonnaada iitana.

11Bessiya wode odetida like qaali, bira miishe bolla tigetida worqa alleeqo mela.

12Era asi zoriya zore si7iya haythas, hessi worqafe woyko geeshsha worqafe oosetida alleeqo mela.

13Katha cakiya wode irxa haathi uyin aleysada, ammanthiya kiitanchoy bana kiittoysa ufaysees.

14Immonnaba immana gidi ceeqetiya asi iri bayna shaaranne carko mela.

15Danda7a asi halaqa odidi mayzees; liiqo qaali meqethi kanthi gelees.

16Eessi demmiko kallana gakanaw ma; shin darsiko nena cooshshana.

17Nena uufishe ixonnaada, ne shooruwa soo ubba wode boopa.

18Ba shooruwa bolla wordon markatiya asi, xam7i, mashshinne toori qoheysada qohees.

19Meto wode ammanetona asan zempoy, qaaxiya achan coommiyanne silida tohon hemeteysa mela.

20Azzanida asas yethi yexiya asi, meego wode ma7o qaariyanne maduntha bolla caalaba tigiya asa mela.

21Ne morkey koshatiko muza; saamotiko ushsha.

22Ne hessa oothiko iya huuphen tama bonqo kaashidi qoleysa mela; Goday nena woytana.

23Doloha bagga carkoy ira eheysada, zigirsi hanqo ehees.

24Doonatiya machira issi keethan daanape kare barandan duussi lo77o.

25Daaburida asi irxa haathi uyidi aleysada, haaho biittafe yaa lo77o odi ufaysees.

26Iita asa sinthan gulbatiya xillo asi, buullotida pultonne iitida olla haatha mela.

27Daro eessi muussi lo77o gidenna; hessadaka, ba boncho koshshi bonchisenna.

28Bana haaronna asi dirsi laaletida katama mela.

← Chapter 24 Chapter 26 →