Proverbs 24

Amharic Gofa GFBLVF (Geeshsha Maxaafa)

1Ta na7aw, iita asata qanaatopa; entara laggetanaw amottofa.

2Enti ubba wode iitabaa maqetoosona; banta inxarsan gene haasayoosona.

3Keethi cincatethan keexetees; akeekan minnees.

4Eri de7iko, qol7i al7obaaninne lo77oban kumees.

5Cinca asi wolqaama asape aadhees; era asi mino asape lo77o.

6Olas keyanaape koyro halchanaw koshshees; daro zore zoriya asatan xoonoy bentees.

7Eeya asi cincatethi akeekanaw danda7enna; shiiqo bessan I odiyabay aybika baawa.

8Iita oothanaw qopiya asi gene asi geetetees.

9Eeya asa qofi nagara; qelqisiya asi ixetees.

10Meto wode ne dol7iko, ne wolqay guutha.

11Pirdi bayna hayqos beyisata ashsha; shukettanaw biya wode si77i gada xeellofa.

12Ne, “Ta hessa erike” giiko, wozana eriya i, be7ennee? Ne de7uwa naageysi erennee? Asa ubbaas iya oosuwada oosuwada zaarennee?

13Ta na7aw, eessi lo77o gidiya gisho, eessi ma; ililo eessi mal7ees.

14Cincatethika hessada ne shempuwas mal7o gideysa era. Neeni iya demmiyaba gidiko, sinthara yaana keehay nebaa; ne ufaysay dhayenna.

15Xillo asa keethi bonqanaw naagopa; iya aquwa dhaysanaw dendofa.

16Xillo asi laapun toho kundikoka dendees; shin iitati gadon dhayana.

17Ne morkey kundiya wode ufaytofa; I dhubetiya wode hashshu goopa.

18Goday hessa be7idi ufaytenna; iya hanqetonna aggaagana.

19Iita ootheyisata gaason hirgofa; enta mela gidarkina gada qopofa.

20Iita asas sinthara yaana keehi baawa; iitata xompey to7ana.

21Ta na7aw, Godaanne kawa yayya; enta bolla makalleysatara hemetofa.

22Hessa mela asata qoponna metoy gakees; kawuwapenne Godaape yaana meto oone erey?

23Cincati gujidi haysada yaagidosona; Som7o be7idi pirdoy lo77o gidenna.

24Qohidaysa lo77o oothadasa giya daynna, asi baaddana; kawotethati iya ixana.

25Qohidaysa ne bala giya daynnati lo77oba ekana daro anjo demmana.

26Tuma zaaro zaariya asi, tuma lagge mela.

27Kasetada ne gadiya goya; kathi zera; hessafe guye, ne keethaa keexa.

28Ne shooruwa bolla gaasoy bayna markatofa; ne doonan cimmofa.

29“I taw oothidaysada ta iyaw oothana; ta iyaw kushe zaarana” yaagopa.

30Taani booza asa goshshara aadhas; azalla addiya woyne gadera kanthas.

31Agunthinne sharaafi goozi wothis; yuushon de7iya dirsayka laaletis.

32Taani iya be7ida wode qopas; iyape timirte ekas.

33Neeni guuthu liipha; guuthu dhiska; ne kushiya shiishada guuthu shempa.

34Shin manqotethi paannoda yaana; duussa waayey ola miishe oykida asada puttu gaana.

← Chapter 23 Chapter 25 →