Proverbs 27

Amharic Gamo (Geeshsha Maxaafa)

1Wontoyssan ceeqettofa; wonto aazi hananaakko ne erakka.

2Nena hara asi galatoppe attiin nerkka nena galatoppa; hara asi nena sabbofe attiin neni nerkka nena sabbofa.

3Shuchchi deexo; anccoy tooko; gido attiin eeya asi denththiza ooshshi nam7atappeka deexxees.

4Sheney menxe iita; hanqoy menxe iita; qanaate sinththan eqqi dandayanay oonee?

5Geemmida siiqoppe qonccen seeriza seeray lo7o.

6Morkkey nena daroto yeeranaappe siiqoy nena dechchizayssi kiya.

7Kallida as eessa ililoy iitees; gido attiin gafida as gara mala cammiza miishshika mal7ees.

8Ba soo aggidi yuuyiza asi, ba keeththafe haakka paalliza kafo mala.

9Shittoynne exaaney as ufayssizayssa mala, siiqo lagge zoreykka ufayssees.

10Ne laggenne ne aawa lagge aggofa; nena metoy gakkiza wode ne ishaakko booppa. Haahon diza ishappe nees matan diza shooroy kiya.

11Ta naazoo! Neni aadho eranchcha gida; ta wozina ufayssa; histtiko tana kadhizayta oyshakka zaarana.

12Cincca asi metoy yiza wode be7idi qotettees; gido attiin akeekay paccida asi meto gars bi gelees; histtidi guyeppe qohettees.

13Erontta asas hurbuta geliza asa may7o qaara ekka; hawusha maccassas waase geliza asa may7o oykka.

14Maalado wonttara ba qaala dhoqqu histtidi ba shooro anjjoy qanggeththa mala qoodettees.

15Ubbaa wode oosh ooyettiza machcha ira gallas pacey baynda aaththiza keeththa mala.

16Carko teqqanaas woykko zayte cucumidi oykkanaas dandayettonttayssa mala izo co7u ooththanaas dandayettenna.

17Biratay birata qarasiza mala asikka issoy issaa qarasees.

18Balase miththayo ishalsidi naagida asi izi ayfe maana; ba godaas ooththiza asi bonchchettana.

19Haaththay heregaththo sinth bessiza mala asa wozinay izaade kando bessees.

20Hayqoynne Bashshi kalli erettenna; hessaththoka asa ayfey kallenna.

21Biraynne worqqay taman paacettidi geeyza mala asikka ba ekkiza galatan paacettees.

22Eeya as kaththa mala udulan yeggada, udula miththan caddizaakkoka izappe eeyateththi kichchenna.

23Ne dorsati de7iza hanota lo7eththada era; ne wudekka wozinappe heemma.

24Ays giikko dureteththi mernaas de7enna; kallachchayka yeletappe yeleta gakkanaas minni de7enna.

25Mela maatay buucettidaappe, aaca maatay ke7idaappe, zumbullata bollan de7iza maatay shiiqidaappe guyen,

26dorsata iskefe neni nees may7o kessana; deyshatan nees goshsha gade shammana.

27Attida deyshata maaththi neessinne ne soo asas, ne macca aylletaskka quma gidanaas kumi palahana.

← Chapter 26 Chapter 28 →