Proverbs 28

Amharic Gamo (Geeshsha Maxaafa)

1Iita asi oonikka yedeththontta baqatees; gido attiin xilloy gaammo mala wozina kumeththa.

2Derey makkalliko haarizay corattees; Gido attiin era asinne akeekiza asi woga essees.

3Hiyeesata un7eththiza daannay kath dhayssiza wolqqama ira mala.

4Woga bonchchontta asi mooranchchata sabbees; gido attiin wogaa bonchchizay istta qofa palqqees.

5Iita asatas suure pirday gelenna; gido attiin GODAAS goynnizayti ubbaaka ereettes.

6Geella as gidi uttidi dure gidanaappe borey baynda hiyeesa gideththi lo7o.

7Wogaa naagiza nay akeekanchcha; gido attiin ganjamatara zuppetizay ba aawa yeellasees.

8Bessontta dishon ba aqota dagasiza asi he aqota hiyeesas kiyiza asas shiishshees.

9Wogaa siyanaappe ba hayth wora zaariza asa woosay Xoossa harassees.

10Suureta iita oge kaaleththiza asi ba bookkida ollan kundana; gido attiin geeshsha asi lo7o miish laattana.

11Dure asi bana aadho eranchcha giidi qoppees; gido attiin akeekay de7iza hiyeesay iza paaccees.

12Xilloti xoonida wode asay ubbay ufayettees; gido attiin iitati maata oykkida wode asay baqatees.

13Ba nagara genththiza asi aacenna; gido attiin paaxizaynne nagara aggizay maarettana.

14GODAAS ubbato yayyiza asi anjjettidaade; gido attiin ba wozina dammasiza asi meton gelana.

15Hiyeesa haariza iita daannay xaaggiza gaammonne guppi oykkiza zardo mala.

16Wozinay paccida daannay menxe iitees; gido attiin bessontta go7a ixxizaadey daro layth de7ees.

17As wodhida asi hayqqana gakkanaas toylattishe dees; iza oonikka shiishshi ekkenna.

18Borey baynda hemettiza asi qohettontta attana; gido attiin geella asi issi gallas kundana.

19Ba gade goyiza mino asi kath kallees; gido attiin hada yo7o kaalliza asi manqoteththaafe ke7enna.

20Ammanettida asi keehi anjjettana; gido attiin durettanaas jaamizay qaxxayettontta attenna.

21Shaakkidi maadoy lo7enna; gido attiin asi guuththa kaththas giidi mooro ooththees.

22Uuzettiza asi durettanaas jaamees; bana hiyeesateththi oykkanayssaka erenna.

23As coo sabbiza asappe seeriza asi guyeppe dosettees.

24Ba aawappenne ba aayppe kaysidi, «Tani aykkoka nagara ooththabeekke» giza asi bashshiza asara issi mala.

25Yiiqey asi oosh denththees; gido attiin GODAAN ammanettizay anjjettees.

26Banan ammanettiza asi eeya; gido attiin aadho erateththan hemettizay saron de7ees.

27Hiyeesas immiza asas paccenna; gido attiin istti be7ishe be7onttaththo hanizaade qanggeththi gakkana.

28Iita asati maata demmiza wode derey baqatees; gido attiin istti dhayza wode xilloti coratteettes.

← Chapter 27 Chapter 29 →