Proverbs 20

Amharic Gamo (Geeshsha Maxaafa)

1Maththosiza ushshi uyizay qilccizaadenne eeya gidees; haytanttan balettida ubbay aadho eranchcha gidenna.

2Kawo hanqoy gaammo xaago mala; iza yiillochchizay ba shemppo bolla pirdees.

3Palamappe haakoy izaades bonchcho; gido attiin eeya asi ubbay ooshshas eesotees.

4Azalla goshshanchchay wodera goyenna; kath shiishshiza wode shiishshanaas koyees; gido attiin aykkoka demmenna.

5Asa wozina halchchoy ciimma ollan de7iza haaththa mala; gido attiin wozinama asi heeppe duuqqi kessees.

6Daro asati bantta kiyateththa yooteettes; gido attiin ammanettiza as ooni demmanaas dandayzee?

7Xillo asi borey baynda de7o dees; izappe kaallidi iza naytikka anjjettidayta.

8Kawoy pirdanaas ba kawoteththa algan uttiza wode iita ubbaa ba ayfetan harqidi kessees.

9«Ta wozinaa geeshshadis; ta geeshsha; tanan nagaray baawa» gaanay oonee?

10GODAY wordo meezaanenne nam7u qommo geeddara miish ixxees.

11Nay geeshshinne suure gidizayssi izi ooththiza ooson erettees.

12Siyiza hayththinne xeelliza ayfe, isttaka GODAY medhdhides.

13Dhisko siiqoppa! Ne histtontta aggiko ne manqana. Minnada ooththa; histtiko neni kath kallana.

14Shammiza asi, «Hayssi al7o! Qohees!» gees; gido attiin shammi simmidaappe guyen, «Hiraysson shammadis» giidi ceeqettees.

15Eray kumida qaala haasayza metershati worqqafenne zo7o inqqufekka aadho geexe.

16Erontta asas waase geliza asa may7o qaari ekkite; hawusha maccassas waase geliza as oykkite.

17Wordon demmida kaththi mal7ees; gido attiin aqi pe7idi doonan ace gidees.

18Zore ekkada halchcho halchcha; zore ekkontta de7ashe olas booppa.

19Zigiranchchay xuura laallees; hessa gishshas lom7ulom7a asappe haakka.

20Ba aawa woykko ba aayo cayizaades, xomppey sakkanna dhuman to7ana.

21Koyrora eeson beettida aqotas wurseththan anjjoy deenna.

22Neessi iita ooththida asas, «tani izas halo kessana» gooppa; GODAAN ammanettada naaga; izi nena ashshana.

23GODAY wordo meezaanen ufayettenna nam7u qommo geeddara miish ixxees.

24Asay baanaas bessiza oge GODAY kaaleththees; histtiin asi barkka ba baana oge wostti akeekanaas dandayzee?

25Issi miish Eesotidi, «Hayssa tani Xoossas immana» giidi adinettidaappe guye zil7eteththi as oykkiza yarde.

26Aadho erateththi diza kawoy makkallanchchata shaakki erees; izi istta qadhettontta qaxxayees.

27Asa ayanay GODAA xomppe; hessa gishshas giddo asateth ubbaa izi pilggi xeellees.

28Kiyateththinne tumateththi kawo naagettees; iza kawoteththa araataykka siiqon minnees.

29Yelagata wolqqay isttas bonchcho; cimata pulunththi isttas bonchcho.

30Mino qixaatey iitateth diggees; wadhay iita wozina laammees.

← Chapter 19 Chapter 21 →