Proverbs 17

Amharic Gamo (Geeshsha Maxaafa)

1Ooshshi de7izason de7iza gita gibira maanaappe saroynne woppay de7izason ukeththa mela meeththi kiya.

2Akeekanchcha aylles shufuro gidida ba goda naa bolla maatay dees; histtidi ishantta mala isttara issife laattees.

3Worqqaynne biray taman paacettizayssa mala GODAY asaa wozina pilggi xeellees.

4Iita asi iita haasaya siyees; wordanchchayka genanchcha haasaya ezgees.

5Hiyeesata bolla qilcciza asi istta medhdhidayssa cayees; hara as gakkiza meton ufayettiza asi qaxxayettontta attenna.

6Nayta nayti cimmida asatas kallachcha; yelidayti bantta naytas bonchcho.

7Lo7o haasayay eeyas giigenna; wordo haasayay dere ayssizaades ay mala deexo!

8Matta7ey immizaades bita mala; izi bida soho ubbaan izas injjetana misatees.

9Qohettidi ba qohoza genththiza asi siiqo koyees; gido attiin yo7o zaari zaaridi piqqiza asi ammanettiza laggeta shaakkees.

10Eeyay xeetuto lisson shociin erizayssafe akeekay de7iza asi coo seeriin erizayssi aadhdhees.

11Iita asi makkalla miish xalla koyees; hessa gishshas iza bolla menxe iita asi kiitettana.

12Eeya asara iza eeyateththa mala gayttanaappe marata bonqqi ekkichchida maaheyra gayteththi kiya.

13Lo7o ooththidaades iita zaarizaadesoppe iitay mulekka dhayenna.

14Oosh doomeththi eele haath pogi yeddo mala; hessa gishshas ooshshi medhettanaappe kasetada kichchaycha.

15Wordanchcha xillo xilloza wordo guussi nam7ayka GODAA sinththan ixettida ooso.

16Aadho erateththi demmanaas izi koyontta gishshas eeya kushen gelida miish iza ay go7anee?

17Laggey ay wodekka lagge; ishaykka meto wodes yelettees.

18Akeekay paccida asi baqqi caaqqidi hara asas waase gelees.

19Oosh dosiza asi nagara dosees; ubbato bana dhoqqu histtizaadey ba bolla bash xeygees.

20Geella qofay de7izaades injjetenna; wordo haasayza asikka meton gelees.

21Eeya naa yeloy ceecisees; eeya naa aawaas ufayssi deenna.

22Ufayettiza wozinay lo7o dhale; gido attiin meqqida wozinay asas wolqqa dhayssees.

23Iita asi pirda geellasanaas geeman matta7e ekkees.

24Akeekay de7iza asi aadho erateth ba sinththafe dhayssenna; gido attiin eeya ayfey sa7a gaxa gakkanaas yuuyees.

25Eeya nay ba aawa ceecisees; bana yelida aayokka xuuggees.

26Xillo as qaxxayo bessenna; suure as shocoy lo7o gidenna.

27Amarda qaala haasayza asi aadho eranchcha; woppa ayanay de7iza asikka akeekanchcha.

28Eeya asi co7u giikko aadho eranchcha misatees; ba doonakka shiishshi oykkiko akeekanchcha misatees.

← Chapter 16 Chapter 18 →