bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Amharic
/
Amharic Dawro DFBLVL (Geeshsha Mas'aafaa)
/
Psalms 89
Psalms 89
Amharic Dawro DFBLVL (Geeshsha Mas'aafaa)
1
Abeet Med'inaa Godaw, aggena ne siik'uwaabaa, taani med'inaw yes's'ana. S'oossay ammanettiyaawaa gaade, yeletaa ubbaw ta doonaan awaayana.
2
Taani aggena ne siik'uu med'inaw ek'k'eeddawaanne neeni ne tumatetsaa saluwaadan minisaade esseeddawaa odana.
3
Neeni, «Taani dooreeddawaana c'aak'uwaa c'aak'k'etaad. Ta k'oomaa Daawitaw hawaadan yaagaade c'aak'k'aad;
4
‹Taani ne zeretsaa med'inaw kawutsana; ne kawutetsaa araataa yeletaa ubbaw minisana› » yaagaadda.
5
Abeet Med'inaa Godaw, salotuu, ne malalissiyaa oosuwaa odino; ne ammanettiyaawaa kiitanchchatuwaa shiik'uu odino.
6
Saluwaan Med'inaa Godaana likkettanaw danddayiyaawe oonee? Saluwaa med'etetsatuwaa giddon k'ay Med'inaa Godaa mali oonee?
7
Geeshshatuwaa shiik'uwaa giddon S'oossay yayetteeddawaa. Barena dooddeeddawanttu ubbaappe aad'd'iide, loytsi dagantsiyaawaa.
8
Abeet Ubbaappe Wolk'k'aama Med'inaa Godaw, S'oossaw, neenaadan wolk'k'aamay oonee? Abeet Med'inaa Godaw, neeni ubbabankka ammanettiyaawaa.
9
Neeni bul"akettiyaa abbaa wolk'k'aa azazaasa. Denddiyaa beetaakka c'o"u ootsaasa.
10
Neeni Ra'aaba giyaa abbaa dawiyaa, wod'i yegeeddawaadan mentsereetsaadda; ne morkkatuwaa ne wolk'k'aama k'esiyaan laalaadda.
11
Salotuu newantta; sa'aykka newaa; biittaanne an kumeedda ubbabaa neeni med'aadda.
12
Huup'issaanne gedissaa neeni med'd'aadda; Taabooranne Hermmoone giyaa wolk'k'aama deretuu nashshechchan ne suntsaa sabbiino.
13
New wolk'k'aama k'eesii de'ee; ne kushii mina; ne ushechchay wolk'k'aama.
14
S'illotetsaynne suure pirdday ne kawutetsaa araataw baaso. Aggena siik'uunne tumatetsay ne sintsaan biino.
15
Abeet Med'inaa Godaw, nashechchaan ililiyaawanttunne ne som"uwaa poo'uwaan hamettiyaawanttu anjjetteedawantta.
16
Ne suntsan gallassaa ubbaa nashettiino; ne s'illotetsaa diraw, unttunttu neena d'ok'k'u d'ok'k'u ootsiino.
17
Unttunttu c'eek'ettiyaa wolk'k'ay neena; ne nashshuwaan nu kac'ii d'ok'k'u d'ok'k'u yaageedda.
18
Nu gonddallii, nu Med'inaa Godaassa; nu kaatiikka, Israa'eeliyaa geeshsha saa.
19
Beni neeni ne ammanetteeda asatoo, itti gede akumuwaan odaadda; «Asaa gidoppe dooreeddawoo kawutetsaa araataa immaadda.
20
Ta k'ooma Daawita kaate kesaad; ta geeshsha zayitiyaan okaade.
21
Ta kushii aanana de'ana; ta k'esiikka Aa mintsana.
22
Aa ay morkkiinne s'oonenna; ay iita asaynne Aa toochchenna.
23
Taani Aa morkkatuwaa Aa sintsan kinchchereetsana; Aa is's'iyaawantta shoc'a yeggana.
24
Ta tumatetsaynne ta aggena siik'uu aanana ittippe gidana. Ta suntsan Aa kac'ii d'ok'k'u d'ok'k'u gaana.
25
Taani Aa kawutetsaa Medetiraaniyaa Abbaa gakkanaw aassana; Aa zawaakka, Efiraas'eesenne S'egiroose Shaafaa gakkanaw aassana.
26
Daawite taana, ‹Neeni ta aawuwaa, ta S'oossaanne taana ashshiyaa zaallaa› yaagiide s'eesana.
27
Taani Aa bayira na'aa ootsana; sa'aan de'iyaa kaatetuwaa ubbaappe Aa darssana.
28
Taani aggena ta siik'uwaa aw med'inaw naagana. Taani aanana k'aalaa c'aak'uwaa mintsana.
29
Taani Aa zeretsaa med'inaw minisaade essana; Aa kawutetsaa araataakka saluwaadan gam"etsana.
30
«Shin Aa zeretsatuu ta higgiyaa aggooppe, k'ay unttunttu ta wogaadan hamettennan is's'ooppe,
31
unttunttu ta awaayuwaa shaarooppe, ta azazuwaa naagana d'ayooppe,
32
taani unttunttu nagaraa diraw gatiman, unttunttu iitatetsaa diraw, lissuwaan, shoc'aade murana.
33
Shin taani aggena ta siik'uwaa aappe akkikke; woy taani aw ammanettiyaawaa aggikke.
34
Taani unttunttunna c'aak'k'eteedda c'aak'uwaa kolikke; ta doonaappe keseedda k'aalaa laammikke.
35
«Itti gedekka med'inaw ta geeshshatetsaan c'aak'k'a diggaad; Daawitew worddotikke.
36
Hewenne, Aa zeretsay med'inaw de'ana; Aa kawutetsaa araataykka ta sintsan awaadan gam"ana.
37
Saluwaan ammanettiyaa markka gidiyaa aginaadan, he kawutetsay med'inaw min ek'k'i de'ana» yaagaadda.
38
Shin ha"i neeni okkaade kaateyeeddawaa bolla daro hank'k'ettaadda; Aa is's'aaddanne aggaada.
39
Neeni ne k'oomaanna c'aak'k'eteedda c'aak'uwaa kaddaadda; Aa kallachchaa baanan olaade tunissaadda.
40
Neeni Aa katamaa gimbbiyaa ubbaa laalaadda; I naagettiyaa miis'aa ubbaa bayzzaadda.
41
Ogiyaanna aad'd'iyaa ubbatuu Aa bonk'k'eeddino; I bare shoorotoo k'iliic'oo gideedda.
42
Neeni Aa morkketoo s'oonuwaa immaadda; unttuntta ubbatuwaa nashechchaadda.
43
Neeni Aa mashshaa s'eeraa k'alam"aadda; neeni olan Aa maaddabaakka.
44
Neeni Aa kawutaa s'am"aa Aa kushiyaappe wotsa akkaada; k'ay Aa kawutetsaa araataa biittan olaadda.
45
Neeni Aa yalagatetsaa wodiyaa k'aamisaadda; k'ay Aa yeellaa mayzzaadda.
46
Abeet Med'inaa Godaw, awude gakkanaw k'onc'c'ikkii? Neeni med'inaw geemmay? Ne hank'k'uu tamaadan awude gakkanaw ees's'anee?
47
Ta laytsay ay keeshshaa k'antsentto k'oppa; asaa ubbaa c'oo mela med'd'aadii?
48
Asay hayk'k'ennan c'oo de'anaw waan danddayii? K'ay duufuwaan gelennaadan, barena ashshanaw waan danddayii?
49
Abeet Godaw, neeni ne tumatetsan Daawitew c'aak'k'eedda, aggena beni ne siik'uu hak'an de'ii?
50
Abeet Godaw, ne k'oomay woyssa boretteeddentto neeni hassaya. Taani asaa ubbaa boriyaa woota danddayaadditantto k'oppa.
51
Abeet Med'inaa Godaw, morkketuu k'iliic'eeddino; neeni dooraade okkeedda kaatiyaa, tangguwaan tangguwaan k'iliic'eeddawaa k'oppa.
52
Med'inaa Goday med'i med'inaw galatetto! Amen"i. Amen"i.
← Chapter 88
Chapter 90 →