Psalms 90

Amharic Dawro DFBLVL (Geeshsha Mas'aafaa)

1Godaw, neeni yeletaa ubbaan, nuuni de'iyaa sa'aa gidaadda.

2Deretuu med'ettanaappe kase, woy neeni sa'aa ootsanaappe kase, med'inaappe med'inaa gakkanawukka neeni S'oossaa.

3Neeni asaa naanatuwaa, «Asaa naatoo, guyye biittaw simmite» yaagaade, unttuntta guyye unttunttu med'etteedda biittaw zaaraasa.

4Sha"u laytsay new zini aad'd'o gallassaa mala; woy k'ammaa giddoppe itti saatiyaa mala.

5Neeni asaa k'oppennaan di'uwaadan afaasa. Unttunttu akumuwaa mala; wontta wontta doliyaa maataa mala.

6He maataykka wontta wode dic'c'iide c'iishshee; omarssiyaa wode shulli melee.

7Nuuni ne yiluwaan wureeddo; ne hank'k'uwaa suuluwaan dagammeeddo.

8Neeni nu iita oosuwaa ne sintsan wotsaadda; k'ay nu geemmeedda nagaraa ne sintsa poo'uwaakko aatsaada.

9Nu gallassaa ubbay ne hank'k'uwaan aad'd'eeda; nu laytsaa itti ooliyaadan wurisseeddo.

10Nu de'uwaa laytsay laappun tamma; woy minnooppe, hosppun tamma; hewekka metuwaanne tugga. Nu laytsay ellekka aad'd'ee; nuunikka ellekka kichcheetto.

11Ne hank'k'uwaa wolk'k'aa eriyaawe oonee? ne hank'k'uwaa suuluu yashshiyaawaa.

12Hewaa diraw, nu laytsaa bessiyaawaadan, go"etana mala aad'd'eeda eraa nuuna tamaarissa.

13Abeet Med'inaa Godaw, ne hank'k'uu awude gakkanaassee? Hayanaa; ne k'oomatoo k'aretta!

14Nu laytsaa ubbaan nuuni nashettanaadaaninne yes's'anaadan, wontta wontta aggena ne siik'uwaan nuuna kalissa.

15Neeni nuuna metoyeedda gallassatuwaa keeshshaanne nuuni tuggaa be'eedda laytsatuwaa keeshshaa, nuuna nashshechchaa.

16Nuw ne k'oomatoo ne oosuu k'onc'c'o; ne bonchcho wolk'k'ay unttunttu naanaatoo beetto.

17Godaa nu S'oossaa keekkatetsay nu bollan gido; nu kushiyaa oosuwaa nuw suurissa. Ee, nu kushiyaa oosuwaa suurissa.

← Chapter 89 Chapter 91 →