Psalms 88

Amharic Dawro DFBLVL (Geeshsha Mas'aafaa)

1Abeet Med'inaa Godaw, taana ashshiyaa S'oossaw, taani gallassi new waassay; k'ammakka ne sintsan yeekkay.

2Ta woosay ne sintsa gakko; ne haytsaa ta waasuwaakko zaara.

3Ayaw gooppe, ta de'uu metuwaan kumeedda; taani hayk'k'ana mataad.

4Taani duufuwaan geliyaa asatuwaana paydetaad; wolk'k'ay bayinna asaa gidaaddi.

5Taani anhatuwaa giddon aggeeda asaa mala; wod'iide duufuwaan yeggeedda asatuwaa mala. Taani ne ubbaa dogeedda, ne maaduwaappe haakkeedda asatuwaa mala.

6Neeni taana c'iimmo ollaan, hirkki d'uma sa'aan yeggaadda.

7Ne hank'k'uu taana dees'ee; ne hank'k'uwaa beetay taana ubbaanna muukkeedda.

8Neeni ta dabbotuwaa taappe haassaadda; unttunttoo taana sheneyiyaawaa ootsaadda. Taani dooddettaad; kessa akkanawukka danddaykke.

9Abeet Med'inaa Godaw, kayyuwaa gaasuwaan ta ayifetuu galjjeeddino. Ubbaa gallassi taani neekko waassay; ta kushiyaa neekko mic'c'aad.

10Neeni hayk'k'eeddawanttoo malalissiyaabaa ootsay? unttunttu denddiide neena galatiino?

11Aggena ne siik'uu duufuwaa giddon haasayettii? neeni ammanettiyaawekka bayetsaa sa'aan odettii?

12Ne malalissiyaa oosuukka d'uman erettii? woy ne s'iltotetsay dogetteedda asatuwaa biittan de'ii?

13Abeet Med'inaa Godaw, taani neekko waassay; wonttaan wonttaan ta woosay ne sintsa gakkee.

14Abeet Med'inaa Godaw, taana neeni ayaw aggay? Ne som"uwaa taappe ayaw gentsay?

15Yalagatetsaappe doommaade, taani tuggataaddinne hayk'k'ana mataad. Taani new dagamaade hiidootaa k'ans's'aad.

16Ne suulliyaa hank'k'uu ta bolla uushoteedda; ne dagamay taana bayzzeedda.

17Unttunttu gallassaa ubbaa di'uwaadan taana dooddeeddino; taana muukkeeddino.

18Neeni ta laggetuwaanne ta siik'otuwaa taappe haassaadda; d'umaa s'alalay taw dabbo.

← Chapter 87 Chapter 89 →