Psalms 147

Amharic Dawro DFBE (ጌሻ ማጻፋ) No Year

1መና ጎዳ ጋላትተ! ኑ ጾሳ ሳቢያዌ ሎአ፤ አ ሳቢያዌ ናሸችያባነ በስያዋ።

2መና ጎዳይ የሩሳላመ ኦራና፤ እስራኤልያ አሳቱዋፐ በቴዳዋንታካ ሺሻና።

3ዎዛናይ መኤዳዋንታ እ ፓ፤ ኡንቱንቱ ማዱካ እ ቃቼ።

4እ ጾልንተቱዋ ኡንቱንቱ ፓይዱዋን ኤሬ፤ ኡንቱንታ ኡባካ ኡንቱንቱ ሱንን ሱንን ጼሴ።

5ኑ ጎዳይ ዎልቃማ፤ አ ዎልቃይ ዳራ፤ አ አኬካይ ልክያፐ አያዋ።

6መና ጎዳይ ናቀቴዳዋንታ ዘምፕሴ፤ ሽን ኢታቱዋ ቢታን ዱገ ኦሌ።

7መና ጎዳዉ ጋላታ የ የጽተ፤ ኑ ጾሳዉ ዲ ዲጽተ።

8እ ሳሉዋ ሻርያ ካሜ፤ ሳአዉ እራ ቡክሴ፤ ቄሪ ደረቱዋ ቦላ ማታ ሞክሴ።

9መሄቶነ ዋስያ ቁሩዋ ማራቶ፥ ምያዋ እ እሜ።

10እ ናሸትያዌ ፓራቱዋ ዎልቃንነ፥ ቶራንቻቱ ምኖተን ግደና።

11መና ጎዳይ ባረዉ ያይያዋንቱንነ አገና አ ሲቁዋን፥ ባረንቱ ህዶታ ዎዳዋንቱን ናሸቴ።

12የሩሳላመ ካታማቴ፥ መና ጎዳ ጋላታ! ጽዮኔ፥ ነ ጾሳ ጋላታ!

13አያዉ ጎፐ፥ እ፥ ነ ፐንግያ ኩልባቱዋ ምንሴ፤ ነ ግዶን ደእያ ነ አሳካ አንጄ።

14እ ነ ዛዋ ሳሮተን ናጌ፤ ኔና ሎይ ሎእያ ዛርጋ ካልሴ።

15እ ባረ ኪታ ሳአዉ ኪቴ፤ አ ቃላይካ ኤለ ጋኬ።

16እ ሻቻ ቡሉኩዋዳን ምጬ፤ ከተርሳ ብድንዳን ላሌ።

17እ ባረ ዎልቃማ ሻቻ ሹቻዳን ዱገ ኦሌ። ሄ ሜጉዋን ኤቃናዉ ኦንነ ዳንዳየና።

18እ ባረ ቃላ ኪቲደ፥ ሻቻ ሙሽሴ። እ ጫርኩዋ ጫርክስና፥ ሃይ ጎጌ።

19እ ባረ ቃላ ያቆባ ዘረዉ፥ ባረ አዋዩዋነ ፕርዳ እስራኤልያ አሳዉ አዋዬ።

20እ ሀራ ካዉተ አሳዉ፥ ሀዋ ኦቤና፤ ኡንቱንቱ አ ፕርዳ ኤርክኖ። መና ጎዳ ጋላትተ!

← Chapter 146 Chapter 148 →