Psalms 112

Afrikaans 2020 (Die Bybel 2020-vertaling)

1Halleluja! Gelukkig is die mens wat ontsag het vir die Here, wat groot vreugde vind in sy gebooie.

2Sy nageslag sal magtig wees in die land – 'n geslag opregtes wat geseën word.

3Oorvloed en rykdom is in sy huis, en sy geregtigheid hou stand vir altyd.

4Hy skyn in die duisternis as 'n lig vir die opregtes; hy is genadig, barmhartig en regverdig.

5Dit gaan goed met 'n mens wat goedhartig is en uitleen, wat sy sake eerlik bestuur;

6want hy sal nooit wankel nie. 'n Regverdige bly vir altyd in die herinnering.

7Vir slegte tyding is hy nie bang nie; sy hart is standvastig in vertroue op die Here.

8Sy hart is bestendig, hy is nie bang nie; uiteindelik sien hy neer op sy teenstanders.

9Hy deel uit, hy gee aan behoeftiges; sy geregtigheid hou stand vir altyd; met waardigheid styg sy aansien.

10Die goddelose sien dit en vererg hom; hy kners op sy tande, maar kwyn weg. Die begeerte van goddeloses gaan tot niet.

← Chapter 111 Chapter 113 →