Isaiah 64

Cebuano RCPV 1999 (Ang Bag-ong Maayong Balita Biblia)

1Maayo unta kon gision mo ang kalangitan ug unya manaog ka aron mangurog ang kabukiran.

2Mangurog gayod sila sama sa tubig nga mobukal tungod sa siga sa kalayo. Ngari ug ipadayag ang imong gahom ngadto sa imong mga kaaway aron mangurog ang kanasoran.

3Sa dihang naghimo kag makalilisang nga buhat nga wala namo paabota, nanaog ka ug nangurog ang kabukiran tungod sa kahadlok kanimo.

4Sukad masukad wala pa gayoy nakadungog o nakakita ug Dios nga sama kanimo, Dios nga motabang niadtong mosalig kanimo.

5Gikahimut-an mo ang nagkinabuhig matarong, ug nagtuman kanimo pinaagi sa pagbuhat sa imong mga sugo. Apan nasuko ka sa dihang nakasala kami ug nagpadayon kami sa pagpakasala sa dugayng panahon.

6Sama kami sa tawong hugaw, ug ang among matarong nga buhat sama lamang sa hugawng pahiran. Nangalaya kami daw dahon ug ang among pagkadaotan daw hangin nga mipadpad kanamo.

7Wala gayoy misangpit sa imong ngalan ug mibangon aron pagdangop kanimo; gitago mo ang imong nawong gikan kanamo ug gipasagdan mo kami tungod sa among mga sala.

8Apan Amahan ka gihapon namo, O Ginoo; kami ang lapok, ikaw ang magkukulon; kaming tanan imong mga binuhat.

9Busa ayaw intawon palabig kasuko, O Ginoo, ug ayaw intawon hinumdomi hangtod sa hangtod ang among kasal-anan; hunahunaa nga kami imong katawhan.

10Nahimo nang kamingawan ang balaan mong mga siyudad; ang Sion nahimo nang diserto, nagmingaw na ang Jerusalem.

11Gisunog ang among balaan ug matahom nga Templo diin gisimba ka sa among katigulangan, ug nangagun-ob ang tanang matahom namong mga dapit.

12Dili ka ba lamang magtagad bisan pa niining tanan, O Ginoo? Magpakahilom ka ba lamang ug sakiton mo ba kami pag-ayo?

← Chapter 63 Chapter 65 →