Isaiah 45

Cebuano RCPV 1999 (Ang Bag-ong Maayong Balita Biblia)

1Gipili ug gimandoan sa Ginoo si Ciro aron pagbuntog sa kanasoran, ug pagpukan sa mga hari, ug pag-abli sa mga ganghaan aron dili na kini sirhan. Mao kini ang iyang giingon kang Ciro:

2“Mag-una ako kanimo ug patagon ko ang kabukiran, dugmokon ko ang mga pultahan nga bronsi ug balion ko ang mga trangkang puthaw.

3Ihatag ko kanimo ang mga bahanding gitagoan diha sa ngitngit, aron masayod ka nga ako, ang Ginoo, ang Dios sa Israel, maoy nagtawag kanimo.

4Tungod sa akong alagad nga si Jacob ug kang Israel nga akong pinili, gihatagan ko ikaw ug dakong dungog bisan pag wala ka makaila kanako.

5“Ako mao ang Ginoo ug wala nay lain, walay dios gawas kanako; gilig-on ko ikaw bisan pag wala ka makaila kanako,

6aron ang katawhan, gikan sa sidlakan hangtod sa kasadpan, masayod nga walay lain gawas kanako; ako mao ang Ginoo ug wala nay lain.

7Akoy nagbuhat sa kahayag ug kangitngit; akoy naghimo sa kabulahanan ug sa katalagman; Ako, ang Ginoo, maoy naghimo niining tanan.

8Ulan na kamong kalangitan, paulanag pagkamatarong ang mga langit; paabliha ang yuta aron motungha ang kaluwasan, ug pinaagi niini patunghaa usab ang pagkamatarong; Ako, ang Ginoo, maoy naghimo niini.”

9Alaot ang makig-away sa iyang magbubuhat, kay sama ra kini sa kulon nga nakig-away sa magkukulon! Moingon ba ang yuta nga kulonon ngadto sa magkukulon, “Unsay imong gihimo?” O “May katakos ka ba?”

10Alaot ang moingon ngadto sa iyang amahan ug inahan, “Nganong gipakatawo pa man ko ninyo?”

11Mao kini ang giingon sa Ginoo, ang Balaang Dios ug Magbubuhat sa Israel: “Wala kamoy katungod pagpangutana kanako bahin sa akong mga anak. Ayaw ako ninyog tudloi sa akong buhaton.

12Ako ang nagbuhat sa kalibotan ug diha niini gibuhat ko usab ang tawo; ang akong kamot maoy naghikyad sa kalangitan, ug ako ang nagmando sa tanan nga anaa sa kalangitan.

13Ako ang nag-agni kang Ciro aron tumanon niya ang akong mga tuyo sa pagpahamtang sa hustisya. Patagon ko ang dalan nga iyang agian; tukoron niya pag-usab ang akong siyudad, ang Jerusalem, ug buhian niya ang nabihag kong katawhan. Buhaton niya kini dili tungod kay gisuholan siya,” nag-ingon ang Ginoo nga Labing Gamhanan.

14Mao kini ang giingon sa Ginoo ngadto sa Israel: “Maimo ang bahandi sa Ehipto ug sa Etiopia, ug maulipon nimo ang tag-as nga mga tawo sa Seba; ug sila mosunod kanimo; moanha sila nga kinadenahan ug moyukbo kanimo ug moingon, ‘Ang Dios nag-uban kanimo, gawas kaniya wala nay laing Dios.

15Ang Dios sa Israel maoy nagluwas sa iyang katawhan; siya ang Dios nga wala magpaila sa iyang kaugalingon.

16Maulawan ug malibog ang nagbuhat ug mga diosdios.

17Apan giluwas sa Ginoo ang Israel, ug ang maong kaluwasan molungtad hangtod sa kahangtoran; dili siya maulawan hangtod sa kahangtoran.’”

18Ang Ginoo mao ang Dios. Siya maoy nagbuhat sa kalangitan ug kalibotan. Gipahimutang niya pag-ayo ang kalibotan ug wala niya kini himoa nga kaguliyang; gihimo niya kini aron puy-an. Siya mao ang nag-ingon, “Ako mao ang Ginoo ug wala nay lain.

19Wala ako magsulti diha sa tago, diha sa mangitngit nga dapit; wala ako moingon sa kaliwat ni Israel, ‘Pangitaa ako diha sa kaguliyang.’ Ako, ang Ginoo, nagsulti sa kamatuoran, ug gipahayag ko ang husto.”

20Ang Ginoo miingon, “Pagtigom ug panuol, kamong nahisalin sa kanasoran! Wala masayod sa ilang gibuhat ang nagdaladala sa ilang mga diosdios nga kahoy, ug nagpadayon pag-ampo sa usa ka dios nga dili makaluwas.

21Ipahayag ug ipasaka ang inyong sumbong; pasabotsabota sila! Kinsay nagtagna niini kaniadto? Kinsay nagpahayag niini sa wala pa kini mahitabo? Dili ba ako, ang Ginoo? Walay laing Dios gawas kanako, Dios nga matarong ug nagluwas sa iyang katawhan.

22“Dangop kanako aron maluwas kamo, katawhan sa tibuok kalibotan, kay ako mao ang Dios ug wala nay lain.

23Nanumpa ako sa akong kaugalingon ug nagpakanaog ako ug matarong nga sugo nga dili ko na bakwion, ‘Mangluhod kanako ang tanang tuhod ug manumpa ang tanang dila.’

24“Bahin kanako moingon sila, ‘Diha lamang sa Ginoo maangkon ang kadaogan ug ang gahom, apan ang tanan nga masilag kaniya mag-antos sa kaulawan.’

25Ako, ang Ginoo, maoy moluwas sa mga kaliwat ni Jacob, ug magdayeg sila kanako.

← Chapter 44 Chapter 46 →