Joel 3

cebuano-2011

1“Kay tan-awa, nianang mga adlawa ug nianang panahona, sa diha nga ibalik nako ang maayong kahimtang sa Juda ug sa Jerusalem,

2tigomon nako ang tanang mga nasod ug dad-on sila ngadto sa walog ni Jehosafat ug didto ipakanaog nako ang hukom ngadto kanila, tungod sa akong katawhan ug sa akong panulondon nga Israel, kay ilang gipatibulaag sila taliwala sa mga nasod ug gibahin ang akong yuta,

3ug nagparipa alang sa akong katawhan, ug ang usa ka bata nga lalaki gibaylo alang sa usa ka babayeng nagbaligya ug dungog, ug nagbaligya ug usa ka dalaga alang sa bino, ug giinom kini.

4“Unsa ba kamo alang kanako, O Tiro ug Sidon ug ang tanang kayutaan sa Filistia? Nagbalos ba kamo kanako alang sa usa ka butang? Kon kamo nagbalos kanako, ako mobalos dayon ug sa hinanali gayod sa inyong binuhatan nganha sa inyong ulo.

5Kay inyong gikuha ang akong plata ug ang akong bulawan ug gidala ang akong daghang mga bahandi ngadto sa inyong mga templo.

6Gipamaligya ninyo ang katawhan sa Juda ug sa Jerusalem ngadto sa mga Grego, gipalayo sila gikan sa kaugalingon nilang yuta.

7Apan karon, aghaton nako sila gikan sa mga dapit diin gibaligya ninyo sila ug balosan nako ang inyong binuhatan nganha sa inyong ulo.

8Akong ipamaligya ang inyong mga anak nga lalaki ug ang inyong mga anak nga babaye ngadto sa kamot sa mga anak sa Juda ug sila ipamaligya nila ngadto sa mga tawo sa Sabea, ngadto sa usa ka nasod nga layo kaayo, kay ang Ginoo nagsulti.”

9Ipahibalo ninyo kini taliwala sa mga nasod: Pangandam alang sa gubat, aghata ang kusgan nga mga tawo. Paduola ang tanang mga tawo sa panggubatan, patungasa sila.

10Himoa nga espada ang inyong mga punta sa daro, ug ang inyong mga galab himoa nga mga bangkaw; ug pasultiha ang luya, “Ako usa ka manggugubat.”

11Pagdali kamo ug duol ngari, kamong tanang mga nasod nga naglibot, pagpundok kamo didto. Pakanaoga ang imong mga manggugubat, O Ginoo.

12Ipaaghat sa mga nasod ang ilang kaugalingon ug patungasa sa walog sa Jehosafat; kay didto ako molingkod aron sa paghukom sa tanang mga nasod nga naglibot.

13Gamita ninyo ang galab, kay ang anihonon hinog na. Panulod kamo, paggiok kamo kay puno na ang pug-anan. Nag-awas ang mga kawa kay hilabihan ang ilang pagkadaotan.

14Mga panon sa katawhan, mga panon sa katawhan atua sa walog sa paghukom! Kay ang adlaw sa Ginoo duol na sa walog sa paghukom.

15Mingitngit ang adlaw ug ang bulan, ug ang mga bituon nawad-an sa ilang kahayag.

16Ang Ginoo mipadahunog gikan sa Zion, ug mipatugbaw sa iyang tingog gikan sa Jerusalem, ug ang kalangitan ug ang yuta nangurog. Apan ang Ginoo dalangpanan sa iyang katawhan, usa ka salipdanan alang sa katawhan sa Israel.

17“Busa kamo makaila nga ako mao ang Ginoo nga inyong Dios, nga nagpuyo sa Zion nga akong bukid nga balaan. Unya ang Jerusalem mabalaan ug didto wala nay langyaw nga molatas niini pag-usab.

18“Nianang adlawa, ang kabukiran magpatulo ug tam-is nga bino, ug ang kabungtoran magpaagas ug gatas, ug ang tanang mga sapa sa Juda magpadagayday sa tubig; usa ka tuboran motungha gikan sa balay sa Ginoo, ug patubigan niini ang walog sa Sitim.

19“Ang Ehipto mahimong awaaw, ug ang Edom mahimong kamingawan nga biniyaan, tungod sa kabangis nga gibuhat ngadto sa katawhan sa Juda, kay gipaagas nila ang dugo sa walay sala diha sa ilang yuta.

20Apan ang Juda puy-an hangtod sa kahangtoran ug ang Jerusalem hangtod sa tanang kaliwatan.

21Panimaslan nako ang ilang dugo, dili nako pasayloon ang sad-an kay ang Ginoo magpuyo sa Zion.”