Isaiah 66

cebuano-2011

1Mao kini ang giingon sa Ginoo: “Ang langit mao ang akong trono, ug ang yuta mao ang akong tumbanan; unsang balaya ang inyong tukoron alang kanako, ug unsang dapita ang akong pahulayan?

2Kining tanang mga butanga gibuhat sa akong kamot, busa kining tanang mga butanga akoa, nag-ingon ang Ginoo. Apan kini mao ang tawo nga akong tan-awon, siya nga mapaubsanon ug mahinulsolon sa espiritu, ug nagkurog tungod sa akong pulong.

3“Siya nga nagpatay ug usa ka baka sama kaniya nga nagpatay ug usa ka tawo; siya nga naghalad ug usa ka nating karnero sama kaniya nga naglunggo sa liog sa usa ka iro; siya nga naghalad ug halad nga pagkaon sama kaniya nga naghalad ug dugo sa baboy; siya nga naghalad ug insenso alang sa paghandom sama kaniya nga nagpanalangin ug usa ka diosdios. Kini sila nagpili sa ilang kaugalingong mga pamaagi, ug ang ilang kalag nahimuot sa ilang kaugalingong mga dulumtanan;

4ako usab magpili ug kasakitan alang kanila, ug magdala sa ilang mga kahadlok nganha kanila; tungod kay sa diha nga ako nagtawag, walay mitubag, sa diha nga ako misulti, sila wala mamati; apan gihimo nila ang unsay daotan sa akong mga mata, ug gipili kadtong wala nako kahimut-i.”

5Pamatia ang pulong sa Ginoo, kamo nga nagkurog tungod sa iyang pulong: “Ang inyong kaigsoonan nga nagdumot kaninyo, ug nagsalikway kaninyo tungod sa akong ngalan nag-ingon, ‘Ipahimaya ang Ginoo, aron makita namo ang inyong kalipay’; apan sila mao ang pakaulawan.

6“Pamatia ang kagubot gikan sa siyudad! Usa ka tingog gikan sa templo! Ang tingog sa Ginoo nga nagpahamtang sa balos ngadto sa iyang mga kaaway!

7“Sa wala pa siya magbati, siya nanganak; sa wala pa moabot kaniya ang kasakit, siya nanganak ug usa ka bata nga lalaki.

8Kinsay nakadungog ug ingon nianang butanga? Kinsay nakakita ug ingon nianang mga butanga? Matawo ba ang usa ka yuta sa usa ka adlaw? Mahimugso ba ang usa ka nasod sa usa ka gutlo? Kay sa diha nga ang Zion nagbati, gianak niya ang iyang mga anak.

9Magpaanak ba ako ug dili mopahimugso? nag-ingon ang Ginoo; ako ba nga magpahimugso, magtak-op ba sa tagoangkan? nag-ingon ang imong Dios.

10“Paglipay kamo uban sa Jerusalem, ug pagmaya alang kaniya, kamong tanan nga nahigugma kaniya; pagsadya uban kaniya diha sa kalipay, kamong tanan nga nagsubo tungod kaniya

11aron kamo makasuso ug mabusog sa iyang makalipay nga mga dughan; aron kamo makainom pag-ayo uban sa kalipay gikan sa kadagaya sa iyang himaya.”

12Kay mao kini ang giingon sa Ginoo: “Tan-awa, ako mohatag ug kauswagan ngadto kaniya sama sa usa ka suba, ug ang bahandi sa mga nasod sama sa usa ka suba nga nag-awas; ug kamo magsuso niini; kamo kugoson diha sa iyang mga bat-ang, ug yugyogon diha sa mga tuhod.

13Sama sa usa ka bata nga gihupay sa iyang inahan, hupayon usab kamo nako; kamo hupayon diha sa Jerusalem.

14Kamo makakita ug ang inyong kasingkasing maglipay; ang inyong mga bukog molambo sama sa balili; ug mahibaloan nga ang kamot sa Ginoo anaa uban sa iyang mga alagad ug ang iyang kaligutgot batok sa iyang mga kaaway.

15“Kay, tan-awa, ang Ginoo moanhi diha sa kalayo, ug ang iyang mga karwahi sama sa alimpulos, aron sa pagpahamtang sa iyang kasuko diha sa kapungot, ug sa iyang pagbadlong pinaagi sa nagdilaab nga kalayo.

16Kay pinaagi sa kalayo ang Ginoo mopahamtang sa hukom, ug pinaagi sa iyang espada, ibabaw sa tanang unod; ug ang mga gipamatay sa Ginoo daghan.

17“Kadtong nagbalaan ug nagputli sa ilang kaugalingon aron sa pag-adto sa mga tanaman, nagsunod sa usa diha sa taliwala, nagkaon ug unod sa baboy, ug sa dulumtanan ug sa ilaga, magdungan sa pagdangat sa kataposan, nag-ingon ang Ginoo.

18“Kay ako nasayod sa ilang mga buhat ug sa ilang mga hunahuna ug ako moabot aron sa pagtigom sa tanang mga nasod ug mga pinulongan; ug sila manganhi ug makakita sa akong himaya,

19ug magbutang ako ug ilhanan taliwala kanila. Ug gikan kanila ako magpadala ug pipila sa mga nahibilin ngadto sa mga nasod, sa Tarsis, sa Put, ug sa Lud nga naggamit sa pana, ngadto sa Tubal ug sa Javan, ngadto sa mga pulo nga layo, nga wala makadungog sa akong kabantog o makakita sa akong himaya; ug sila magpahayag sa akong himaya taliwala sa kanasoran.

20Ug ilang dad-on ang tanan ninyo nga mga kaigsoonan gikan sa tanan nga mga nasod ingon nga usa ka halad ngadto sa Ginoo, diha sa mga kabayo ug sa mga karwahi ug sa mga inatopan nga sakyanan, ug sa mga mula, ug sa mga kamilyo, ngadto sa akong balaan nga bukid nga Jerusalem, nag-ingon ang Ginoo, sa diha nga ang mga Israelinhon maghatod sa ilang halad nga pagkaon diha sa usa ka hinlo nga sudlanan ngadto sa balay sa Ginoo.

21Ug ang pipila kanila usab akong himoon nga mga pari ug mga Levihanon, nag-ingon ang Ginoo.

22“Kay ingon nga ang bag-ong kalangitan ug ang bag-ong yuta nga akong buhaton magpabilin sa akong atubangan, nag-ingon ang Ginoo magpabilin usab ang inyong kaliwatan ug ang inyong ngalan.

23Gikan sa bag-ong subang sa bulan ngadto sa bag-ong subang sa bulan, ug gikan sa usa ka adlawng igpapahulay ngadto sa laing adlawng igpapahulay, ang tanang mga tawo manganhi aron sa pagsimba sa akong atubangan, nag-ingon ang Ginoo.

24“Ug sila manggula, ug manan-aw sa mga patayng lawas sa mga tawo nga misupil kanako; kay ang ilang ulod dili mamatay, ang ilang kalayo dili mapalong, ug sila mahimong dulumtanan sa tanang tawo.”