Isaiah 25

cebuano-2011

1O Ginoo, ikaw mao ang akong Dios; pasidunggan ko ikaw, dayegon nako ang imong ngalan; kay naghimo ikaw ug mga butang nga katingalahan, mga laraw sa dugay na nga panahon, kasaligan ug matuod.

2Kay imong gihimo nga usa ka tinapok ang usa ka siyudad, ang kinutaang siyudad nagun-ob; ang dangpanan sa mga langyaw dili na usa ka siyudad, kini dili na gayod matukod pag-usab.

3Busa ang mga kusgan nga mga katawhan magpasidungog kanimo; ang mga siyudad sa makalilisang nga mga nasod mahadlok kanimo.

4Kay ikaw nahimong usa ka lig-ong salipdanan sa kabos, usa ka lig-ong salipdanan sa nanginahanglan diha sa iyang kagul-anan, usa ka salipdanan gikan sa bagyo, usa ka landong gikan sa kainit; kay ang pagdasmag sa tawong bangis sama sa bagyo batok sa usa ka bungbong,

5sama sa kainit sa usa ka dapit nga uga. Imong gipahilom ang kabanha sa mga langyaw; sama sa kainit diha sa landong sa usa ka panganod, ang awit sa mga bangis gipahunong.

6Niining bukira ang Ginoo sa mga panon maghimo alang sa tanang mga katawhan ug usa ka kasaulogan sa tambok nga mga butang, usa ka kasaulogan sa mga maayong bino, sa mga butang nga tambok nga puno sa uyok, sa maayong bino nga pinalugdang nga maayong pagkasala.

7Ug iyang gub-on niining bukira ang tabon nga gilabay ibabaw sa tanan nga mga katawhan, ang pandong nga gibukhad ibabaw sa tanan nga mga nasod;

8iyang lamyon ang kamatayon hangtod sa kahangtoran. Ang Ginoong Dios magpahid sa mga luha gikan sa tanang mga nawong ug ang kaulaw sa iyang katawhan kuhaon niya gikan sa tibuok nga yuta, kay ang Ginoo nagsulti niini.

9Isulti unya kini nianang adlawa, “Tan-awa, kini mao ang atong Dios; kita naghulat kaniya aron siya magluwas kanato. Kini mao ang Ginoo, kita naghulat kaniya; magmaya kita ug maglipay diha sa iyang pagluwas.”

10Kay ang kamot sa Ginoo mopahulay niining bukira, Ang Moab yatakan diha sa iyang dapit, ingon sa uhot nga gitumban diha sa tinapok nga hugaw.

11Ug iyang bukharon ang iyang mga kamot sa taliwala niini, ingon sa naglangoy nga magbuklad sa iyang mga kamot aron sa paglangoy, apan ipaubos sa Ginoo ang iyang garbo uban sa kabatid sa iyang mga kamot.

12Ang habog nga mga paril sa imong mga kuta iyang pukanon, ipaubos ug lumpagon ngadto sa yuta, ngadto sa abog.

← Chapter 24 Chapter 26 →