Hosea 9

cebuano-2011

1Ayaw pagmaya, O Israel! Ayaw paglipay sama sa mga katawhan; kay ikaw nagbaligya sa imong dungog, mibiya sa imong Dios. Ikaw nahigugma sa suhol sa usa ka babayeng nagbaligya sa iyang dungog diha sa tanang giokanan.

2Ang giokanan ug ang pug-anan sa bino dili maghatag kanila ug pagkaon, ug ang bag-ong bino magpakyas kanila.

3Sila dili magpabilin sa yuta sa Ginoo; apan ang Efraim mobalik ngadto sa Ehipto, ug sila magkaon sa hugaw nga pagkaon didto sa Asiria.

4Sila dili na magbubo ug mga halad nga bino alang sa Ginoo, ug sila dili makapahimuot kaniya pinaagi sa ilang mga halad. Ang ilang pan mahisama sa pan sa nagsubo; ang tanan nga mokaon niini mahugawan, kay ang ilang pan alang man sa ilang kagutom; kini dili dad-on ngadto sa balay sa Ginoo.

5Unsay inyong buhaton sa adlaw sa tinakda nga kasaulogan, ug sa adlaw sa kasaulogan sa Ginoo?

6Kay bisan ug sila makaikyas sa kalaglagan, ang Ehipto magtigom kanila, ang Memfis maoy maglubong kanila. Ang mga sampinit maoy manag-iya sa mga bililhon nilang mga butang nga plata, ang mga tunok maanaa sa ilang mga tolda.

7Ang mga adlaw sa pagsilot miabot na, ang mga adlaw sa pagbalos midangat na; ang Israel mahibalo niini. Ang propeta buangbuang, ang tawo nga nagbaton ug espiritu buang, tungod sa dako nimong kasal-anan ug dakong kasilag.

8Ang propeta maoy tigbantay sa Efraim, ang katawhan sa akong Dios, apan ang usa ka lit-ag sa mangangayam ug langgam anaa sa tanan niyang mga dalan, ug ang kasilag anaa sa balay sa iyang Dios.

9Sa hilabihan gayod gihugawan nila ang ilang kaugalingon, sama sa mga adlaw sa Gibea; hinumdoman niya ang ilang pagkadaotan, silotan niya ang ilang kasal-anan.

10Sama sa mga paras diha sa kamingawan, akong nakaplagan ang Israel. Sama sa unang bunga sa kahoyong igera sa unang pagpamunga niini, nakita nako ang inyong mga katigulangan. Apan nangadto sila sa Baal-peor ug naghalad sa ilang kaugalingon ngadto sa kaulawan ug nangahimong dulumtanan sama niadtong ilang gihigugma.

11Ang himaya sa Efraim molupad sa layo sama sa langgam, walay pagpanganak, walay pagmabdos, walay pagsamkon!

12Bisan ug sila nag-atiman ug mga bata, kuhaan nako sila hangtod nga walay mahibilin. Alaot sila sa diha nga ako mobiya kanila!

13Ang mga anak ni Efraim, ingon sa akong nakita, gitakda nga tukbonon. Si Efraim kinahanglang magdala sa iyang mga anak ngadto sa ihawan.

14Hatagi sila, O Ginoo, unsa ang imong ihatag? Hatagi sila ug tagoangkan nga kanunayng makuhaan ug uga nga mga suso.

15Ang tanan nilang pagkadaotan atua sa Gilgal; didto nagsugod ako sa pagdumot kanila. Tungod sa pagkadaotan sa ilang mga binuhatan hinginlan nako sila gikan sa akong balay. Dili na ako mahigugma kanila; ang tanan nilang mga pangulo mga masupilon.

16Ang Ephraim gihampak, ang ilang gamot naughan, dili kini makapamunga. Bisan ug sila manganak, akong patyon ang gihigugma nila nga mga anak.

17Ang akong Dios magsalikway kanila tungod kay sila wala mamati kaniya ug sila mahimong latagaw diha sa mga kanasoran.

← Chapter 8 Chapter 10 →