Ezekiel 24

cebuano-2011

1Sa ikasiyam nga tuig, sa ikanapulo nga bulan, sa ikanapulo nga adlaw sa bulan, ang pulong sa Ginoo midangat kanako,

2“Anak sa tawo, isulat ang ngalan niining adlawa, niini gayong adlawa. Ang hari sa Babilonia misulong sa Jerusalem niini gayong adlawa.

3Ug pagsulti ug usa ka sambingay ngadto sa masupilong banay, ug ingna sila, Mao kini ang giingon sa Ginoong Dios: Ipahimutang ang usa ka kawa, itak-ang kini ug sudli usab kini ug tubig.

4ibutang niini ang mga hiniwa nga unod, ang tanang maayong bahin, ang paa ug ang abaga; pun-a kini sa pinili nga mga bukog.

5Kuhaa ang labing pinili sa panon, ug hapniga ang sugnod sa ilalom sa kawa. Pabukali kini pag-ayo ug lat-i ang mga bukog niini sulod sa kawa.

6“Busa mao kini ang giingon sa Ginoong Dios: Alaot ang dugoon nga siyudad, sa kawa nga anaa ang taya ug nga ang taya wala mogula gikan niini! Kuhaa gikan niini ang tagsatagsa ka bahin sa walay pagpili.

7Kay ang dugo nga iyang giula anaa sa iyang taliwala; iya kining gipahimutang ibabaw sa bato; wala kini iyabo sa yuta aron tabonan kini sa abog.

8Aron sa paghagit sa akong kasuko, aron sa pagpanimalos, gipahimutang nako sa bato ang dugo nga iyang giula aron dili kini matabonan.

9Busa mao kini ang giingon sa Ginoong Dios: Alaot ang dugoon nga siyudad! Padakoon usab nako ang pundok.

10Tapoka ang sugnod, halinga ang kalayo; lat-i ug maayo ang unod, ug iyabo ang sabaw, ug pasagdi nga mapagod ang mga bukog.

11Unya itungtong kini nga walay sulod ibabaw sa mga baga aron kini mainit ug ang bronsi niini masunog aron nga ang kahugaw niini matunaw, ang taya niini mahurot.

12Sa walay kapuslanan gihago nako ang akong kaugalingon, ang bagang taya niini wala mogula pinaagi sa kalayo.

13Ang taya niini mao ang hugaw nga pagkalaw-ay. Tungod kay gihinloan ko na unta ikaw ug ikaw wala mahinlo, gikan sa imong pagkahugaw dili na gayod mahinlo pa hangtod nga matagbaw ako sa akong kasuko nganha kanimo.

14“Ako, ang Ginoo, mao ang nagsulti; Kini mahitabo gayod ug buhaton nako kini. Dili ako mosibog, dili ako magsaylo, dili ako maghinulsol. Sumala sa imong mga pamaagi ug sa imong mga buhat, hukman ko ikaw, nag-ingon ang Ginoong Dios.”

15Ang pulong sa Ginoo midangat kanako,

16“Anak sa tawo, ania hapit na nako kuhaon gikan kanimo ang kalipay sa imong mga mata sa usa ka kalit nga hampak, apan bisan pa niana, dili ikaw magsubo o maghilak o magpaagas sa imong mga luha.

17Panghupaw, apan ayaw kusga. Ayaw pagbangutan tungod sa mga nangamatay. Ihigot ang imong purong ug isul-ob ang mga sandalyas sa imong mga tiil, ug ayaw taboni ang imong mga ngabil o kaona ang pan sa mga tigbangutan.”

18Busa ako misulti sa katawhan sa pagkabuntag, ug sa pagkagabii ang akong asawa namatay. Ug sa sunod nga buntag nagbuhat ako sumala sa gisugo kanako.

19Ug ang katawhan miingon kanako, “Dili ba ikaw mosulti kanamo kon unsa ang kahulogan niining mga butanga alang kanamo, nga nagbuhat man ikaw sa ingon?”

20Unya miingon ako kanila, “Ang pulong sa Ginoo midangat kanako:

21‘Sultihi ang banay sa Israel, Mao kini ang giingon sa Ginoong Dios: Tan-awa, pasipalahan nako ang akong balaan nga dapit, ang garbo sa inyong gahom, ang kalipay sa inyong mga mata, ug ang tinguha sa inyong kalag. Ug ang inyong mga anak nga lalaki ug mga anak nga babaye nga inyong gibilin mangapukan pinaagi sa espada.

22Ug kamo magbuhat sumala sa akong gibuhat. Ayaw taboni ang inyong mga ngabil, o kaona ang pan sa mga tigbangutan.

23Ang inyong mga purong anha sa inyong mga ulo, ug ang inyong mga sandalyas anha sa inyong mga tiil. Dili kamo magbangotan o maghilak apan magniwang kamo tungod sa inyong kasal-anan ug mag-agulo ngadto sa usag usa.

24Sa ingon niini si Ezekiel alang kaninyo mao ang usa ka timaan; sumala sa tanan nga iyang gihimo kamo magbuhat. Sa diha nga kini moabot na, kamo makaila nga ako mao ang Ginoong Dios.’

25“Ug ikaw, anak sa tawo, sa adlaw nga kuhaon nako gikan kanila ang ilang salipdanan, ang ilang kalipay ug himaya, ang kalipay sa ilang mga mata, ug ang mga tinguha sa ilang mga kasingkasing, ang ilang mga anak nga lalaki ug mga anak nga babaye,

26nianang adlawa may usa nga nakaikyas nga moanha kanimo, aron pagsugilon kanimo sa balita.

27Nianang adlawa ikaw mobuka sa imong baba ngadto sa nakaikyas, ug ikaw mosulti ug dili na ikaw maamang. Busa ikaw mahimong timaan alang kanila ug sila makaila nga ako mao ang Ginoo. ”

← Chapter 23 Chapter 25 →