Isaiah 41

cebuano-1999

1Ang Dios miingon, “Paghilom kamo ug pamati kanako, mga kapuloan; pangandam kamo; paduol kamo ug sulti; duol kamo kanako aron maghusay kita.

2“Kinsay nagpatungha sa tawo nga gikan sa sidlakan ug naghimo kaniyang madaogon bisan asa siya paingon? Gitugyan sa Dios kaniya ang mga hari ug kanasoran; gipahabas niya sila daw abog lamang, ug ingon sila sa uhot nga gipadpad sa iyang pana.

3Gigukod niya sila ug wala gayoy mibabag kaniya; kusog kaayo siya midagan, daw wala magtunob ug yuta.

4Kinsay naghimo niini? Kinsay nagbuot sa dagan sa kasaysayan? Ako, ang Ginoo, nga diha na sa sinugdanan ug anaa usab sa kataposan.

5“Ang kapuloan nakakita ug nahadlok; natay-og ang tibuok kalibotan busa nanuol ug nag-ambahan sila pag-anhi.

6Ang matag usa mitabang sa iyang isigkatawo ug nagdinasigay sila.

7Ang panday nagdasig sa platero; ang nagporma sa diosdios nagdasig sa nagpakang sa lansang; bahin sa pagsolda may miingon, ‘Maayong pagkasolda’— ug gilansang nila ang diosdios aron dili na matarog.

8“Apan ikaw, Israel, akong alagad, katawhan ka nga akong gipili, kaliwat ni Abraham nga akong higala.

9Gikuha ko ikaw sa labing layong dapit sa kalibotan ug gitawag gikan sa kinasuokang bahin niini ug giingnan, ‘Ikaw akong alagad,’ gipili ko ikaw ug dili gayod isalikway.

10Ayaw kahadlok kay mag-uban ako kanimo; ayaw kabalaka kay ako mao ang imong Dios; lig-onon ug tabangan ko ikaw, panalipdan ug luwason.

11“Pakaulawan ko ang tanan nga nasilag kanimo ug mangamatay ang makig-away kanimo.

12Mangita ka sa mga nakig-away kanimo apan dili mo sila hikaplagan; ang imong mga kaaway mangamatay gayod.

13Kay ako, ang Ginoo nga imong Dios, maoy naglig-on kanimo; ako ang nagsulti kanimo, ‘Ayaw kahadlok, kay tabangan ko ikaw.’”

14Ang Ginoo nag-ingon, “Ayaw kahadlok, Israel, bisag sama ka lamang sa ulod kagamay ug kahuyang kay tabangan ko ikaw. Ako, ang Balaang Dios sa Israel, moluwas kanimo.

15Himoon ko ikaw nga galamiton sa paggiok nga may bag-o ug hait nga mga ngipon; giukon ug dugmokon mo ang kabukiran ug himoon mo ang kabungtoran nga sama sa uhot.

16Alig-igon mo sila; ug ipadpad sila sa hangin ngadto sa layo ug katagon sila sa bagyo. Apan magmalipayon kamo kay ako man ang Ginoo, ang inyong Dios; daygon ninyo ako, ang Balaang Dios sa Israel.

17“Sa dihang mangitag tubig ang mga kabos ug timawa, ug wala silay hikaplagan ug mag-uga ang ilang tutonlan sa kauhaw, ako, ang Ginoo, motabang kanila; ako, ang Dios sa Israel, dili gayod mobiya kanila.

18Padagaydayon ko ang mga suba diha sa upaw nga kabungtoran ug ang mga tuboran taliwala sa kawalogan; himoon kong linaw ang diserto, ug patunghaon ko ang mga sapa diha sa diserto.

19Magtanom akog sidro, acasia, mirtol ug olibo didto sa kamingawan ug malukop kini sa sipre, palo de tsina ug aguho,

20aron ang katawhan makakita ug masayod nga ako, ang Ginoo, ang Balaang Dios sa Israel, maoy naghimo niini.”

21Ang Ginoo, ang hari sa Israel, nag-ingon niini: “Mga dios sa kanasoran, ipasaka ang inyong sumbong. Ipadayag ang inyong mga pagpamatuod.

22Panuol kamo; suginli kami sa mga butang nga nangagi ug sultihi kami unsay mahitabo sa umaabot aron masayran namo kon mahitabo na kini.

23Sultihi kami unsay mahitabo sa umaabot aron makaila kami nga mga dios diay kamo; pagbuhat kamog makaayo o makadaot ba hinuon, aron motuo kami.

24Wala kamoy hinungdan ug walay kapuslanan ang inyong binuhatan; angay kasilagan ang mosimba kaninyo.

25“Nagpili akog tawo nga gikan sa sidlakan ug paatakihon ko siya gikan sa amihanan; magtawag siya sa akong ngalan ug tamaktamakan niya ang mga hari sama ug lapok lamang, sama sa himoon sa magkukulon inigtamaktamak niya sa yuta nga himoong kulon.

26Kinsa kaninyo ang mipahayag niini sukad gayod sa sinugdan aron kami masayod, ug sa wala pa magsugod ang kapanahonan aron moingon kami, ‘Husto siya’? Wala gayoy usa kaninyo nga nakatug-an kanamo bahin niini.

27Ako, ang Ginoo, maoy unang nagpahayag niini ngadto sa Sion, ug gipadala ko sa Jerusalem ang usa ka tigpahibalo sa maayong balita.

28Sa dihang nagpakisayod ako sa mga diosdios, walay nakatubag sa akong mga pangutana.

29Walay pulos silang tanan ug walay mahimo; ang ilang mga diosdios nga larawan huyang ug walay gahom.”

← Chapter 40 Chapter 42 →