Isaiah 28

cebuano-1999

1Alaot ang gingharian sa Efraim! Ang iyang himaya nagkalawos na sama sa koronang bulak, nga gipurongpurong sa iyang mga hubog nga mga pangulo. Nangalimyon sa pahumot ang ilang mapagarbohong mga ulo, apan nangatumba sila sa kahubog.

2Ang Ginoo may sinugo nga kusgan ug gamhanan aron pag-ataki kanila. Sama siya sa unos sa yelo, sama sa usa ka kusog nga bagyo, ug nagdalag daghang tubig nga iyang ibundak sa yuta.

3Yatakyatakan ang korona nga gipasigarbo sa mga palahubog sa Efraim,

4ug mahanaw ang nagkalawos nga katahom niining mapahitas-on nga mga pangulo, sama sa unang nahinog nga bunga sa igera panahon sa ting-init; inigkakita sa tawo niini, iya kining pupuon ug kan-on.

5Niadtong adlawa ang Ginoo nga Labing Gamhanan mahimong sama sa koronang matahom, alang sa nahibilin sa iyang katawhan.

6Hatagan niyag kaalam sa paghukom ang mga maghuhukom, ug kaisog kadtong mipasibog sa mga kaaway nga diha na sa ganghaan sa siyudad.

7Bisan ang ilang mga pari ug mga propeta nagsusapinday sa kahubog kay nakainom mag isog nga bino, ug wala na silay maayong panghukom; dili na makasabot ang propeta sa mga panan-awon nga gipakita sa Dios kanila; ang mga pari wala nay maayong panghukom sa mga kaso nga ilang gihusay.

8Nagyanang sa sinuka ang lamisa, ug walay dapit nga wala mahugaw.

9Nagmulo bahin kanako ang katawhan ug miingon, “Kinsa may gitudloan nianang propetaha? Kinsa may nagkinahanglan sa iyang mensahe? Maayo lamang kanang mensahea sa mga bata nga bag-o pang nalutas.

10Balikbalik ang iyang tinudloan ug kutikutihan kaayo siya.”

11Kon dili kamo mamati kanako, makigsulti ang Ginoo kaninyo pinaagi sa mga langyaw nga dili masabot ang sinultihan.

12Gitanyagan kamo niyag pahulay ug kalipay, apan wala kamo mamati kaniya

13kay alang kaninyo ang pulong sa Ginoo balikbalik lamang ug walay pulos, busa matikay-ang kamo ug mabitik ug bihagon.

14Busa kamong mapahitas-on nga nagmando niining katawhan dinhi sa Jerusalem, pamatia ninyo ang pulong sa Ginoo.

15Kay kamo nag-ingon man, “Kami ug ang kamatayon, ingon man ang Seol, may gikasabotan, ug inig-abot sa kastigo, sayloan kami kay ang bakak ug ang limbong mao may among dalangpanan.”

16Busa nag-ingon ang Ginoong Dios, “Ipahimutang ko sa Sion ang usa ka sukaranang bato nga nasulayan na sa kalig-on, bililhong bato alang sa lig-ong sukaranan: ‘Ang mosalig niini makabaton ug kalig-on.’

17Sama sa paggamit ug tunton sukdon ko sila pinaagi sa hustisya ug pagkamatarong; ug silhigon sa unos nga yelo ang mga bakak nga ilang dalangpanan, ug ang ilang salipod sanapag tubig.”

18Unya dili na matuman ang gikasabotan ninyo sa kamatayon ingon man sa Seol, ug inighapak sa makalilisang nga katalagman, mahiagom gayod kamo niini.

19Mahiagom gayod kamo inig-agi niini matag buntag ug gabii, ug ang kalisang mismo maoy magpasabot kaninyo sa mensahe sa Dios.

20Mahisama kamo sa tawo nga naghigda apan dili makatuy-od, kay ang higdaanan mubo man kaayo; ug naggamit ug habol nga dili paigong ihabol tungod sa kagamay niini.

21Kay ang Ginoo mobarog sama sa iyang gibuhat didto sa bukid sa Perazim, ug masuko siya sama sa nahitabo didto sa walog sa Gibeon. Usa kini ka buhat nga katingalahan ug talagsaon.

22Busa ayaw kamo pagbugalbugal kay tingali unyag pahugtan ang paggapos kaninyo; nadungog ko nga laglagon sa Ginoo nga Labing Gamhanan ang tibuok nasod.

23Busa pamati kamo sa akong isulti kaninyo.

24Magpunay ba lag daro ang mag-uuma ug walay tanom-tanom?

25Sa pagkalimpyo na sa pugsanan, dili ba isabod man niya ang anis ug lunga, ug tinudlingon pagpugas ang trigo ug sebada ug tamnag laing klase sa trigo ang kadaplinan niini?

26Kay bahin niini gitudloan siya sa Dios.

27Ang anis ug lunga dili sama sa trigo ug sebada nga giukon o paligsan.

28Ligson ba niya ang lugas aron himoong pan? Dili siya magpadayog giok hangtod sa hangtod; dili niya paligsan sa karomata ug sa iyang kabayo ang mga lugas.

29Kining maong mensahe naggikan sa Ginoo nga Labing Gamhanan; kahibulongan ang iyang mga tambag ug dili matukib ang iyang kaalam.

← Chapter 27 Chapter 29 →