2 Corinthians 11

Baoule Bible 1996 (Kuo :Dele')

1:Yee' 'an 'bhorn a 'ye a-a': porluh⧾ dih kpon: weh-beh:, 'do: bobo-dhih: 'an yi-a: za 'da bo. A: korn 'gen, 'an 'bhorn a 'ye-eh' no.

2'An no: gwlehehn' a-a' dhih,: ka Nyorsoa-a no-a. A gweh 'nynor-kpao'-yu:: or se-a nyor-kpalu-dhih yubo:, 'de: or: gweh-a: vlehehn'-',: or: korn-a wlu 'on po-a: dhama'-': or 'ye-a nyor-kpalu: due' 'bli 'ti, an 'da-dih-a 'Klae.

3Jorwor:: fano-a: no 'on, deh: eh: no-eh 'do 'Ii bo, eh: ne-': no-eh: 'do a bo. Sehn po: bhuli' 'de eh: bo-dih-or dih, 'de or no deh-zon. 'De: ka: ne-a: due' 'di, a-a' 'dlu⧾ 'beh-dih: en 'ye 'o: gwie 'i 'wluh 'weh,: eh 'ye-eh' no 'de a-a' 'Klae-a': ybeh-a': eh tba-a 'de a 'di dih,: eh: gweh-a: vlehehn'-', eh 'ye 'kor: ke.

4Deh no-eh,: mor nyor: noror' yi 'o a bo, 'de or 'ye tubo-wlu:⧾: en kor-a: Yusu': noror' 'i po,: or: se-a: yor: or: korn-a tubo-wlu:⧾: a po-a 'de a bo. 'De mor a 'ye: zulu:: noo' 'ye,: on: se-a Nyorsoa-a': Zulu:: yuh a 'ye-a: zai', 'de a 'ye tubo-wlu:⧾: nee': nee' dih kpon,: eh: se-a: yih a kpon-a dih: zai',: yee' eh-: 'o, a 'worn-dih ken dih.

5:Yee' 'on yubo-eh': Yusu'-a'a: dboo-nyor:⧾: daa, a 'da-dih-a dhih-a' 'i 'beh-nyor:⧾: on: zi-a 'o nyor⧾-a' klehkpeh-',: ka on no-a, on 'kpa-a deh ken, 'ka-: 'on no, 'on 'kpa deh ken 'de deh⧾-a' klehkpeh 'di.

6Eh gweh 'on: se-' dha deh 'chean'-dih: 'do: wlu-a' bo 'bla, jorwor: 'on 'ble deh-' dih 'worn-eh: 'gboror:.: A: florn-dih-eh ken dih 'weh, deh 'jeh, 'de a bo: zai'.

7'On po Nyorsoa-a' tubo-wlu:⧾ 'jeh 'weh 'de a bo, 'de 'on: se-' a geli': za-dih-deh dih dhele:. 'On: ya 'an 'jeh ya 'weh 'de a bo, 'de eh 'ye a ya-' 'duo:.: Mor 'on: taa: ao' no,: yee' deh-zon: 'o, 'on no 'de Nyorsoa bo: e?

8'Chore-nyor:⧾: noo' 'nyi 'on 'wlii:, 'de 'on 'ye-ih: koan: no-dih: 'de a 'nyne-'.: Mor 'on: taa 'ye,: yee' 'an 'yli nyor⧾: an 'nyi-a 'on 'wlii:: dao' 'weh, 'do a-a': za-dih-eh bo.

9:Yee' ti 'on: ne-a 'de a bo, 'de 'an son: gweh-a, 'on: se-' a-a' nyor 'worn dih 'beh-dih:. Deh no-eh, 'Klae: de-di'-boi': on 'wluh-a 'Masordo'nia-bluhba ken, mo-:: ya 'on deh⧾-a' klehkpeh 'on se-a 'ble.: Yee': ka 'on no-a, 'de 'on se-a a 'worn dih 'beh-dih:, 'ka-: 'an mu: no, 'on: se-' a 'worn dih 'beh-dih: i,: ka eh mu-a 'dlu-': tehn.

10'Klae-a za-' dhih-a' 'yor-eh 'do ti-a' klehkpeh bo.: Yee' 'ka-: 'an no: ke,: mor 'on 'da nyor se 'noror: Ehki'a-bluhba ken: ne,: or 'ye-a 'on 'borboa' 'i po,: mor 'on: taa 'an 'jeh dhih bo po 'do deh: daa, eh-a' dhih.

11:Eh: korn dhih: oo': eh? 'On se a-': ybeh: dhih 'o: e? Nyorsoa yubo-eh', 'on: ybeh a-uh' 'weh.

12Deh 'an no-a 'do ti-a' klehkpeh bo, eh-: 'an mu 'dlu bo: kpa, 'de eh 'ye nyor⧾: dao',: an 'bhorn-a: on 'ye-a an-a' 'jeh 'i 'beh-dih:, 'borboa' 'i po, 'de on: ne-' 'an-a:: koan: 'an no-a, 'an nor 'i: po-dih:.

13Nyor⧾-kpalu:⧾: dao', on: se: Yusu'-a'a: dboo-nyor:⧾ 'jeh: no. An 'tmo sih 'do: koan: an no-a bo. 'De on po an-a' 'jeh 'kpa, on gweh 'Klae-a'a: dboo-nyor:⧾ 'jeh no.

14Eh: se deh: oo': eh 'ye 'de a 'di dih 'ma-dih:: deh. 'Ku-a' 'jeh: ke, an za-dih-', 'de an gweh 'enjor:: or: korn-a dhih-a' 'i 'beh-a'-a fan.

15:Yee' eh: se deh: dele': mor 'ku-a' 'bhoi-nynuu po an-a' 'jeh 'kpa, 'de on 'ye 'yi 'sleh-Nyorsoa-a' 'bhoi-nynuu gweh. 'Do eh-a' 'dlu-': jla 'da, deh⧾ on no-a, me-:: korn geli': za-dih-deh: an mu 'ye-:.

16:Yee' 'an za-eh-: de: neheh'. Nyor-a' 'da-dih: 'on: bobo-nyor. Jorwor:: mor nyor no-eh,: yee' 'nyi or kpon 'on dih: ka nyor: or kpon-a: bobo-nyor dih, 'de 'on 'ye 'an 'jeh 'i 'beh-dih:: weh-beh:.

17Deh 'an za-': naa, eh: se 'tele': Gwlor: baa' 'nyi-a 'on. 'Jeh 'i 'beh-dih-eh: 'an 'da-a,: ka: bobo-nyor-a wlu-a, 'ka-: 'o 'an wlu.

18Jorwor:: ka nyor⧾: dhulu'-a 'beh-dih-a an-a' 'jeh 'i,: ka 'kmo-a no-a,: yee' 'an 'jeh: ke, 'an mu 'an 'jeh 'i 'beh-dih:.

19A se: ao', a: mor: toror': korn-nyor:⧾ 'o: neheh': e? Eh-:: korn dhih, 'de a: za: bobo-nyor⧾ 'yli-eh dih, 'de: porluh⧾-a' dih 'pehn ka 'di: neheh': e?

20:Yee': mor nyor: no-dih: a 'ge-yu, a za-or 'yli-eh dih: chio'lo:. 'De mor: mor nyor 'yli a bo, a za-or 'yli-eh dih: chio'lo:. 'De mor: mor or-a': yeh 'vleh a 'dlu dih, or-a': yeh po a 'kpa 'yli, a za-or 'yli-eh dih: chio'lo:, 'de or no-eh.

21A: korn a-a' deh 'gen o nii:. Jorwor: 'mor: mloror', eh po 'on dhen-' dih, 'on se eh-a': gwluhuh'-': ku: kao:, 'on 'ye deh: eh: ne: ao' no 'do a 'bhun o. Jorwor:: mor nyor: ku: gwluhuh' or 'ye or-a' 'jeh 'i 'beh-dih: 'do deh-a' dhih bo, keen': ke,: yee' 'an mu: gwluhuh': ku, 'on 'ye 'an 'jeh 'i 'beh-dih: 'do deh: ne-a: due', eh-a' dhih bo: ke. 'An wlu-': ka: bobo-nyor 'i: naa.

22An-a' 'jeh: daa, mo-:: Hiblu'-nyor⧾: oo': e? 'Ka-: 'on: ne: ke. Mo-: 'Ezlea-nyor⧾: oo': e? 'Ka-: 'on: ne: ke.: Ae' mo-: 'Eble'hehn-a' 'di-a'-nynuu: oo' ke? 'Ka-: 'on: ne: ke.

23:Ae' mo-: 'Klae-a' 'bhoi-nynuu: oo' ke? (:Mor 'on: taa: ao': wlu-a' no,: yee' sena-: no 'on.) 'On zi-uh' 'weh 'do 'bhoi-yu-deh-a' no 'da. 'On no: koan:: dhulu', 'on zi-uh'. 'On: po-eh:: kasue 'di kpor⧾: dhulu' 'di, eh zi-uh'. Nyor⧾ bla 'on, eh zi-uh': ke. 'De 'an pobo 'de 'meh-a' 'yli 'de, 'do ti: dhulu' 'di, eh zi-uh'.

24:Jueh'-nyor⧾-a' sene'eh⧾-a': kwlaa taan 'yor: meheh': nyieh, me-: 'on 'ye 'do kpor⧾: mm' 'di.

25'Wloon-nyor⧾ no 'an tu⧾: bla-dih-eh kpor⧾ taan. 'De eh: korn ti: due' nyor⧾: noo': tba-dih: 'on sobu'⧾ dih, on 'ye 'on 'dba: dee'. 'De 'ni ken-meheh no 'an 'wla-dih-eh kpor⧾ taan. 'De 'on no zorn-we-eh-: glu-we-eh-: 'do yobo' 'worn, ti 'ni ken-meheh 'wla-dih:-a 'on.

26Deh⧾-a' klehkpeh 'an na-' dih, 'an na 'de 'meh-a' 'worn dih. 'Yii'-ni-a' 'dhan-a'-: 'ylii'-nyor⧾ 'nyne-': yi-dih-eh-: 'on 'bli: Jueh'-nyor⧾-: 'dekorn: nyor⧾: on: se-a: Jueh'-nyor⧾-:: an 'bhorn-a: on 'ye-a 'on 'dba, 'de gwlor⧾ 'di dih-: 'de 'kwla 'di-: 'de yobo' ken-: 'dekorn: 'de-di'-boi': an 'da-dih-a an-a' 'jeh 'Klae-a' klei': zi-nyor⧾ 'de: an 'tmo-a sih-: en-' klehkpeh: dao', me-: 'dhu 'de 'meh-a' 'an na 'de 'worn dih.

27'On no: koan: 'gabaa, eh: zi 'o ken dih. 'Do ti: dhulu' 'di, 'an-a' 'mo. 'De 'moeh-: 'ni 'na-ton-: en no 'on, 'do ti: dhulu' 'di. 'An-a' 'ble dii-deh-: 'dekorn: paa-wla-:. 'De: chehbe'-a no 'on.

28:Yee' 'on: se-': yih: daa: mlee' 'da. Jorwor: 'gbeh: klaba' 'on 'ble-a eh-: 'dhu, 'an: porluh⧾-a 'beh-dih 'on 'worn dih, zorn 'o zorn, 'do 'chore-nyor⧾-a' klehkpeh-a' dhih bo.

29Or-a' 'nyne: or: korn 'kpih-a: chehn, 'de 'an ne: se-' chehn: ke: eh? Nyor: yoror: or: korn 'be no-eh, 'de or no deh-zon, 'de 'an: porluh: se-' 'plun: eh?

30:Mor eh 'dhu 'on: korn 'on 'ye 'an 'jeh 'i 'beh-dih:,: yee' deh on po-a 'on dhen-' dih: poo: 'do: gwlor-nyor⧾ ybei', eh-:: korn dhih 'an mu 'an 'jeh 'i 'beh-dih:.

31Nyorsoa: or no-a: a-a': Gwlor: baa': Yusu': Baa', or yubo-eh': ka 'on se-a sih 'tmo.: Bhorlie' 'do or bo,: ka ti-a mu-a 'dlu-': tehn.

32Ti 'on: ne-a 'de: Dama'kor-gwlor 'di,: yee' 'gomla-nyor⧾-a' nyor: klaba': or: ne-a 'o 'Keen: Ali'ta 'zorn, or-: po 'o nyor⧾ 'do gwlor-a' gba-dih-gba worn 'i, on 'ye 'on kpon.

33Jorwor: 'de: too' 'di, 'do: wor nyor⧾ po 'on, 'de on: ya-dih: 'o 'on gba-dih-gba-a': dha-beh:: or: florn-a worn 'de: too' 'di, 'de on 'si-dih: 'on dih, 'de 'on ple, 'on 'dhan 'de or 'kwa dih.

← Chapter 10 Chapter 12 →