Leviticus 16

Baoule (NYANMIƐN NDƐ'N 1998)

1Kɛ Aarɔn i wa yasua nnyɔn mun be dili wlɛwlɛ be fali like ng'ɔ ti-man Anannganman'n i liɛ'n be kpɛnnin Anannganman nyrun lɔ bɔ be ko wu'n, Anannganman wa seli Moiz kɛ yoo:

2«Se ɔ niaan Aarɔn kɛ nán man ɔ wlu min lika kpa tra su'n i nun lɔ ngbɛn-ngbɛn, yɛ nán man ɔ sin tannin dan ng'ɔ o min alaka'n nin i su tre'n be nyrun lɛ'n i sin lɔ finfin. Sɛ ɔ wlu lɔ sɔ'n, ɔ ´wu. Afin i blɛ nga wɛnsrɛn'n ɔ ´jaso alaka tre'n su'n, i sɔ blɛ liɛ'n nun yɛ n ´yi mín wun nglo-ɔ.

3Min lika kpa tra su'n, sɛ Aarɔn ´wlu lɔ'n, man ɔ fa nannin tola kun tra nun nan ɔ wa yi min kpatalɛ tɛ man min, nan n kusu m'an yaci i wun sa m'an cɛ i, kpɛkuun man ɔ fa bua nene kun ekun nan ɔ ´fa yi tɛ nga be yrɛ i nnɛn'n kɔlikɔli'n man min.

4Tralɛ tɛnndɛn'n nin nga be fali lɛn yɛ be wuli'n, man ɔ wla be. Be klun nyanman nga be fa lɛn yɛ be yoli'n, man ɔ fa ci i klun. Kpɛkuun kle bɔ lɛn yɛ be fa yoli'n, man ɔ fa wlɛ i ti. I sɔ ninnge bɔ be ti min sulɛ liɛ'n, kɛ ɔ wa ´wla be'n, blɛ kwlaa nga b'ɔ wa fa min ninnge sɔ mun, man ɔ dun mmua wunnzin.

5Man Izraɛlfuɛ'm be mɛn i boli nnyɔn nan ɔ fa yi min kpatalɛ tɛ'n, yɛ man be mɛn i bua nene kun ekun nan ɔ fa yi tɛ nga be yrɛ i nnɛn'n kɔlikɔli'n.

6Aarɔn i bɔbɔ i sa tɛ ng'ɔ yoli'n i su yɛlɛ nannin tola'n b'ɔ fa yi tɛ'n. Like nga be yo bɔ n yaci bé wun sa'n n cɛ be'n, ɔ `fa yo i bɔbɔ, ɔ nin i awlofuɛ'm bé su.

7Kɛ ɔ ko yo i sɔ'n, kpɛkuun man ɔ fa boli nnyɔn'n wɔ min nyrun lɔ tannin sua'n nga n yi min wun nglo nun'n i anuan'n nun lɔ.

8Yɛ ɔ `tu nnɛn sɔ'm bé wun fɔtɔ nan ɔ `wun ng'ɔ ti min liɛ'n, nan ɔ `wun nga kusu b'ɔ ti Azazɛl i liɛ'n.

9Nnɛn nga b'ɔ ti min liɛ'n, ɔ `fa kle min nan be `fa yi min kpatalɛ tɛ'n.

10Azazɛl i boli liɛ'n, be kun-mɛn i, be dun mmua be fɛ i be ko sie min nyrun be yi sraka'n kwlaa nan b'a fɛ i a wɔ aawlɛ dan'n nun lɔ b'a fa ko man Azazɛl.

11Man Aarɔn fa nannin'n yi i bɔbɔ i ti tɛ liɛ'n. Kpɛkuun like nga bɔ sɛ be yo-ɔ n yaci bé wun sa'n n cɛ be'n, man ɔ fa yo i bɔbɔ nin i osufuɛ'm bé su. Kpɛkuun man ɔ kpɛ nannin tola'n i kɔmin.

12Sɛnmlɛn ng'ɔ o min sɔwlɛ'n su min nyrun lɔ'n, ɔ `ko fa wie ɔ `wa guɛ i sɛnmlɛn guawlɛ like'n nun, ɔ `fla ansans nzuɛn'n i sa buɛ nnyɔn, kpɛkuun kɛ n wo lɛ'n bɔ tannin dan'n ɔ kpɛ lɛ'n, ɔ `fa ninnge sɔ'm be ngba wlu lɔ.

13Man ɔ fa ansans nzuɛn'n ɔ guɛ i sɛnmlɛn su min nyrun lɛ. Kpɛkuun i wɛnsrɛn ng'ɔ fite lukuu'n, ɔ ´kata min alaka'n bɔ i nun yɛ min mmla blu'n wo'n ɔ nin i tre'm bé su. Sɛ Aarɔn yo i sɔ'n, wie'n su kun-mɛn i.

14Ɔ `fɛ i sama'n kun bo nannin'n i mmoja'n nun, nan ɔ `fa kpɛntɛn-kpɛntɛn alaka'n i tre'n i bue ng'ɔ kaci wia afiliɛ lɔ'n su kpalɛ kun. Kpɛkuun ɔ `fa kpɛntɛn-kpɛntɛn alaka'n i nyrun wa kpɛ nso.

15Kpɛkuun boli'n b'ɔ ti mɛn mma'm bé tɛ i ti srɛlɛ liɛ'n, ɔ `kpɛ i kɔmin, nan ɔ `fa boli'n i mmoja'n wlu kɛ tannin dan'n ɔ kpɛ lɛ'n i sin lɔ, nan like kunngba nga b'ɔ fali nannin tola'n i mmoja'n yoli'n, ɔ `fa yo i sɔ, ɔ `fa kpɛntɛn-kpɛntɛn alaka tre'n i bue ng'ɔ kaci wia afiliɛ lɔ'n su, yɛ ɔ fa kpɛntɛn-kpɛntɛn alaka'n i nyrun wa'n su.

16Izraɛlfuɛ'm be sa tɛ fanunfanun nga be yo'n b'ɔ ti fiɛn b'ɔ o bé wun'n, bɔ i sɔ fiɛn liɛ'n ɔ'a sa min lika kpa tra su'n, lika sɔ'n i fiɛn salolɛ like'n, man ɔ yo. Kpɛkuun ɔ `yo i sɔ ekun tannin sua'n i onga'n nun lɔ. Afin sran nga sua sɔ'n ɔ jin be afiɛn'n, be ti fiɛn, ɔ man i sɔ fiɛn'n ɔ sali sua'n.

17Blɛ nga bɔ Aarɔn ɔ ´kpɛn min nyrun'n, b'ɔ ´yi bé wun fiɛn salolɛ tɛ'n, lele b'ɔ ´fa fite'n, ɔ fata-man kɛ sran kun sa tran tannin sua'n nun lɔ. Like nga be yo-ɔ n yaci bé wun sa n cɛ be'n, kɛ Aarɔn ko fa ko yo i bɔbɔ nin i awlofuɛ mun, ɔ nin Izraɛlfuɛ'm be kwlaa bé su'n,

18kpɛkuun man ɔ jaso tannin sua'n nun lɔ bla sua sɔ'n i nyrun lɛ. Yɛ like nga be yo be fa salo bé wun fiɛn'n, man ɔ fa yo min sɔwlɛ'n su. Ɔ `fa nannin tola'n i mmoja'n kan, ɔ nin boli yasua'n i mmoja liɛ'n kan, nan ɔ `fa kpɛnkpɛn min sɔwlɛ'n i cɔnjɔ-cɔnjɔ'm bé su.

19Man ɔ fɛ i sama'n kun bo mmoja'n nun nan ɔ `fa kpɛntɛn-kpɛntɛn min sɔwlɛ'n su kpɛ nso. Kɛ ɔ ´yo i sɔ lɛ'n, wuun fiɛn'n bɔ Izraɛlfuɛ'm be fa kannin min sɔwlɛ sɔ'n, i kplolɛ yɛ ɔ ´kplo i lɛ-ɔ. Kpɛkuun wuun ɔ'a sin i osu laa'n nun ekun.

20Kɛ Aarɔn ko wie min lika kpa tra su'n nin tannin sua'n i onga'n, ɔ nin min sɔwlɛ'n be wun fiɛn'n i kplo'n, ɔ `se be nan be `fa boli kpakpuɛ kun nga b'a kun-mɛn i'n be bla.

21Kɛ be fɛ i sɔ boli kpakpuɛ liɛ'n ba'n, man Aarɔn fɛ i sa nnyɔn'n gua boli sɔ'n i ti'n su, yɛ Izraɛlfuɛ'm bé sa tɛ'n nin bé nyin bɔ ɔ'a yi-man min'n, ɔ nin fɔnlɛ nga be fɔnnin'n, man Aarɔn kɛnngɛn i ngba guɛ i boli'n su. Kpɛkuun sran nga bɔ be yili i kɛ ɔ `fa boli'n wɔ aawlɛ flɛnnɛn i afiɛn lɔ'n, ɔ `fa mɛn i nan ɔ `fa wɔ.

22Boli'n i aawlɛ'n nun lɔ fa kɔlɛ'n, ɔ kle kɛ Izraɛlfuɛ'm bé sa tɛ nga be yoli'n, i fa kɔlɛ yɛ boli'n ɔ'a fa ɔ aawlɛ flɛnnɛn wie i afiɛn lɔ lɛ-ɔ.

23Man Aarɔn sɛ i sin tannin sua'n nun lɔ nan lɛn tralɛ ng'ɔ wlali be'n nan ɔ'a wlu mín sua'n nun lɔ'n, ɔ `yi be guɛ lɔ.

24Man ɔ wunnzin lika kun b'ɔ ti min liɛ nun, kpɛkuun ɔ `wla tralɛ uflɛ. Kpɛkuun ɔ `fite nan tɛ nga be yra be nnɛn'n kɔlikɔli'n, ɔ `yi i bɔbɔ liɛ'n, yɛ ɔ yi mɛn mma'm be liɛ'n. I sin, like nga be yo bɔ n yaci bé wun sa'n n cɛ be'n, ɔ `fa yo i bɔbɔ nin mɛn mma'm bé su.

25Kpɛkuun nnɛn nga be fali be be yili min kpatalɛ tɛ'n, Aarɔn `fa be luilui lika mun, ɔ `ko gua be min sɔwlɛ'n su lɛ, nan ɔ `yra be.

26Sran nga b'ɔ fali Azazɛl i boli yasua'n ɔli aawlɛ flɛnnɛn'n dan'n nun lɔ'n kusu, man ɔ kpu i wun tralɛ mun nan ɔ `wunnzin kwlaa nan ɔ'a kpɛn min nanmue'n nun lɔ.

27Nannin tola'n nin boli yasua nga be fali be be yili min kpatalɛ tɛ'n, bɔ be fali be mmoja'n be kploli bé wun fiɛn'n, man be fɛ i sɔ nnɛn liɛ mun be jaso min nanmue'n nun lɛ, be fa wɔ nanmue'n i sin lɔ nan be `yra bé kplo'n nin be nnɛn ba'n, ɔ nin be klun ninnge mun.

28Sran nga b'ɔ wɔ i sɔ nnɛn liɛ'm be nun'n, man ɔ kpu i wun tralɛ mun, ɔ `wunnzin nan ɔ'a sɛ i sin min nanmue'n nun lɔ.

29Nian, mmla kun yɛ ɔ o yɛ, amun `di su titi: afuɛ kwlaa kɛ anglo nso'n ko ju'n, i cɛn ba blu'n su'n, amun Izraɛlfuɛ mun, ɔ nin aofuɛ ng'ɔ o Izraɛl asiɛ'n su'n, amun kwlakwla, amun `ci nglɛmun, yɛ nán amun di junman fi.

30I sɔ cɛn liɛ'n nun yɛ sa tɛ nga amun yoli'n, yɛ be ´yo i su sa nin-ɔn. I sin be ´kplo amún wun fiɛn'n. Kpɛkuun min nyrun lɛ yɛ amún sa tɛ'n kwlakwla ɔ ´tu amún wun-ɔn.

31Cɛn sɔ'n, amun `fa yo amun wunmiɛn-delɛ-cɛn mlɔnmlɔn, yɛ amun `fa yo amun nglɛmun cilɛ cɛn. I sɔ mmla liɛ'n, amun `di su tititi.

32Ɔ ´cɛ kɔ'n, sran nga bɔ be guɛli i ti su ngo kɛ ɔ `kaci min nyrun jranfuɛ'm be su kpɛn, sa nga be yo-ɔ sɛ ɔ ti sa tɛ i yaci cɛlɛ-ɔ be yaci be cɛ'n, ɔ nin bé wun fiɛn kplolɛ'n, i yɛ ɔ ´yo be-ɔ. M bɔbɔ min sulɛ tralɛ liɛ nga be fa lɛn yɛ be wuli'n, ɔ ´wla be.

33Ɔ ´salo min lika kpafuɛ i wun fiɛn'n. Ɔ ´salo tannin sua'n i onga'n i wun fiɛn'n kusu wie, kpɛkuun ɔ ´salo min sɔwlɛ i wun fiɛn'n. Min nyrun jranfuɛ'm bé wun fiɛn'n, ɔ ´salo i kusu wie, kpɛkuun ɔ ´salo Izraɛlfuɛ'm be wunmuan'n be wun fiɛn'n.

34I sɔ mmla liɛ'n, amun `nanti su titi. Amun `fa su nan afuɛ nuan kun nun'n, sa tɛ nga amun Izraɛlfuɛ mun amun yoli'n, n ´kan bo nun nan n ´yaci n cɛ amun.» Aarɔn niannin ndɛ nga Anannganman kan kleli Moiz'n i kwlakwla su yoli!

← Chapter 15 Chapter 17 →