Isaiah 39

Baoule (NYANMIƐN NDƐ'N 1998)

1I blɛ sɔ nun'n, Baladan i wa Bɛrɔdak-Baladan b'ɔ ti Babilɔni famiɛn'n, ɔ tili i kɛ Ezekias wunnɛn yoli i ya nan ɔ'a yo juejue. Ɔ blɛli i fluwa, ɔ fa like sieli su kɛ be `fa mɛn i.

2Sa sɔ'n yoli Ezekias fɛ kpa. I ti ɔ sɔli Babilɔni famiɛn'n i sran'm be nun, ɔ tili be jasin. Ɔ fali sua nga i ninnge kpakpa'm be o nun'n i nun ninnge wunmuan'n kleli be. Jɛtɛ ufue, nin sika ɔkwlɛ, nin ayre fannin, nin ngo kpakpa, nin alɛ ninnge mun, ɔ nin i bɔlɛ'n nun ninnge'n kwlaa, like fi nun-man lɛ bɔ Ezekias ɔ'a fa kle-man be-ɔ. Ninnge nga be o i bɔbɔ i sua'n nun o, nga be o i nvle'n kwlakwla nun nin o, ɔ fɛli i kwlakwla sɔ'n kleli be.

3Yɛ Ezai b'ɔ ti Nyanmiɛn i nuan ijɔfuɛ'n ɔ wa toli Ezekias-ɔ. Ɔ usɛli i kɛ: «?Sran sɔ'm be waan nzɛ? ?Ninfan mɛn liɛ'n nun yɛ be fin-ɔn?» Ezekias tɛli i su kɛ: «Be fin mɛn mmua kpa kun nun, be fin Babilɔni.»

4Ezai usɛli i ekun kɛ: «?Nguɛ yɛ be wunnin i ɔ́ sua'n nun lɔ-ɔ?» Ezekias tɛli i su ekun kɛ: «Be wunnin mín sua'n nun ninnge'm be ngba. Min ninnge kpakpa be nun kun nun-man lɛ bɔ m'an fa kle-man be-ɔ.»

5Yɛ Ezai seli Ezekias kɛ: «Sie ɔ́ su tie Anannganman b'ɔ sie mɛn wunmuan'n i nuan ndɛ'n. I wan yoo:

6‹Ninnge ng'ɔ o ɔ sua'n nun'n nin nga ɔ nannan'm be tiantiannin i nuan lele bɔ wa fa ju ndɛ yɛ'n, cɛn kun wa ju bɔ ba kun sa su ka-man lɛ. Be ´fɛ i kwlaa sɔ'n kɔ Babilɔni.

7Be wa fa ɔ bɔbɔ ɔ osu'n nun ba yasua wie mun, be ´sɛ be, be ´fa be kɔ Babilɔni famiɛn i awlo lɔ, yɛ be ´su i.› »

8Ezekias tɛli Ezai su kɛ: «Jasin nga Anannganman fa wlali ɔ́ nuan kɛ a bo kle min'n ti jasin fɛ, afin min blɛ su'n, aunjuɛ cɛ yɛ e ´nyɛn i-ɔ, yɛ alaje cɛ yɛ e ´di-ɔ!»

← Chapter 38 Chapter 40 →