Acts 9

Baoule (NYANMIƐN NDƐ'N 1998)

1Kɛ ɔ ´yo sɔ'n, wuun Sɔl tɛ wla e Min'n i sɔnnzɔnfuɛ'm be srɛ kɛ ɔ ´kun be, i sɔ'n ti'n, ɔ ɔli Nyanmiɛn nyrun jranfuɛ'm be su kpɛn'n i wun lɔ

2ko srɛli i kɛ ɔ mɛn i Nyanmiɛn ndɛ suanlɛ nin i srɛlɛ sua nga be o Damas lɔ'n bé wun fluwa, nan sɛ ɔ to sran wie lɔ'n, sɛ yasua o, sɛ bla o bɔ be fa ndɛ nga su'n, ɔ ´ci be ba Zerizalɛm.

3Kɛ ɔ ´kɔ b'ɔ wa ju Damas lɔ'n, kpɛkuun nyanmiɛn'n kpaja piaa guɛli i su.

4Ɔ tɔli, yɛ ɔ tili sran kun nɛn. Sran sɔ'n ɔ seli i kɛ: «?Sɔl, Sɔl, nguɛ ti yɛ a kle n yalɛ sɔ-ɔ?»

5Yɛ ɔ usɛli i kɛ: «?Nannan, be flɛ wɔ sɛ?» Yɛ ɔ seli kɛ: «Min Jésus-ɔ, min yɛ a kle min yalɛ nin-ɔn.

6Sanngɛ jao wlu klɔ'n nun lɔ, be wa kle wɔ like nga a wa yo'n.»

7Be bɔ be kɔ i sunmanlɛ'n, be jin lɛ be tɔli amule, be tili nɛn sɔ'n, sanngɛ b'a wun-man sran fi.

8Sɔl jaoli, i nyinma'n gua su, sanngɛ ɔ wun-man ase. Be trɛli i sa be fɛ ɔli Damas lɔ.

9Ɔ dili le nsan ɔ wun-man ase, ɔ di-man like, ɔ nɔnman nzue.

10Kɛ ɔ ´yo sɔ'n, wuun Jésus i sɔnnzɔnfuɛ kun o Damas lɛ, be flɛ i kɛ Ananias. Ɔ wunnin e Min'n aolia nun, ɔ flɛli i. Ananias tɛli su kɛ: «Nannan, m'an sro!»

11Yɛ e Min'n seli i kɛ: «Jao kɔ atin bɔ be flɛ i Seiin'n su Zidas awlo lɔ, ko nian Sɔl b'ɔ fin Tars'n i osu. Ɔ nin Nyanmiɛn be su koko yalɛ.

12Ɔ wunnin bian kun bɔ be flɛ i kɛ Ananias'n aolia nun, ɔ wluli i sin lɔ, ɔ fɛ i sa fuɛli i su nan ɔ `wun ase.»

13Ananias seli kɛ: «Nannan, n tili tɛtɛ nga bian sɔ'n yoli ɔ sran mun Zerizalɛm lɔ'n i kwlaa. Sran sunman bé nuan nun yɛ n tili-ɔ.

14Yɛ Nyanmiɛn nyrun jranfuɛ dandan'm be mɛnnin i atin kɛ sran kwlaa b'ɔ bo ɔ dunman klɔ nga su wa'n, ɔ `ci i!»

15Sanngɛ e Min'n seli i kɛ: «Kɔ, afin bian sɔ'n, m'an fɛ i kɛ ɔ di n junman'n, nan ɔ bo n dunman'n nvle wie'm be nun famiɛn mun nin Izraɛlfuɛ'm be nyrun,

16yɛ m ma fa nyrɛnnɛn ng'ɔ wa wun i n dunman nun'n i kwlaa n kle i.

17Ananias ɔli, kɛ ɔ juli awlo lɔ'n, ɔ fɛ i sa'n fuali Sɔl su, yɛ ɔ seli i kɛ: «Min niaan Sɔl, kɛ a ´ba'n, e Min Jésus b'ɔ fiteli ɔ nyrun atin'n nun lɔ'n, ɔ sunmannin min kɛ m ma tike ɔ́ nyin nan Nyanmiɛn Wawɛ'n `fa wɔ kaci i liɛ mlɔnmlɔn.»

18I osu kunngba sɔ nun'n like wie kɛ kpatra wun bui sa fin i nyin su tɔli nan ɔ'a wun ase.

19Ɔ jaoli nan b'a yo i batɛm. Kɛ ɔ dili like'n, ɔ nyannin wunmiɛn ekun. Ɔ dili le nnyɔn kun Jésus sɔnnzɔnfuɛ'm bé wun Damas lɛ,

20kpɛkuun ɔ su kan ndɛ Nyanmiɛn ndɛ suanlɛ nin i srɛlɛ sua'm be nun, ɔ kan kɛ Jésus ti Nyanmiɛn Wa.

21Be nga be tili i ndɛ b'ɔ kan'n, be kwlaa bé nuan boli bé wun yɛ be seli kɛ: «?Nɛ́n i yɛ ɔ kle be bɔ be bo dunman sɔ'n be nyrɛnnɛn Zerizalɛm lɔ nin-ɔn? ?Ɔ'a ba-man wa kɛ ɔ wa ci be kɔ Nyanmiɛn nyrun jranfuɛ dandan'm bé ja su?»

22Sanngɛ ndɛ kanlɛ'n sili Sɔl wun, yɛ i ndɛ'n kwla Zuif nga be tran Damas lɔ'n be liɛ'n. Kɛ ɔ ´kan kɛ Jésus ti Krist'n, b'ɔ ´yiyi nun kle be'n, be lɛ-man ndɛ fi kɛn-mɛn i kun.

23Kɛ ɔ dili le nnyɔn kun'n, Zuif'm be cicili kɛ be ´kun Sɔl,

24sanngɛ Sɔl tili be njiciɛ sɔ'n. Be sɛsɛ i klɔ'n i anuan'm be nun kɔnguɛ nin wia nun kɛ be ´kun i.

25Sanngɛ kɔnguɛ'n, i sɔnnzɔnfuɛ'm be fɛ i wlali gbogbo kun nun nan b'a jrɛ i klɔ i wun nga be sili'n i sin lɔ.

26Kɛ Sɔl juli Zerizalɛm lɔ'n, i waan ɔ ´fɛ i wun mantan Jésus sɔnnzɔnfuɛ mun, sanngɛ be kwlaa be sro i, be lafi-man su kɛ ɔ'a yo Jésus sɔnnzɔnfuɛ sakpa.

27Sanngɛ Barnabas fɛli i be ɔli be bɔ Jésus sunmannin be'n be wun lɔ, ɔ kan kleli be kɛ Sɔl wunnin e Min'n atin'n nun, nan ɔ nin i be ijɔli, i sin ɔ kannin ndɛ yakpa su Jésus dunman nun Damas lɔ.

28Kɛ ɔ fin cɛn sɔ nun'n, ɔ nin be wlan Zerizalɛm klɔ'n nun, be kɔ be ba,

29yɛ ɔ kan ndɛ e Min'n dunman nun yakpa su. Yɛ ɔ kan ndɛ kle Zuif'm bɔ be ijɔ Grɛk'n, yɛ be si akplowa, be sɔfuɛ'm be yɛ be klo kɛ be ´kun i nin-ɔn.

30Kɛ aniaan'm be tili i sɔ'n, be fɛ ɔli Sezare nan be man ɔ'a ɔ Tars.

31Asɔnunfuɛ'm bɔ be o Zide, nin Galile, ɔ nin Samari mɛn wunmuan'n nun lɔ'n, be lɛ alaje, yɛ asɔnun'n kɔ i nyrun. Kɛ bɔ asɔnunfuɛ'm be nyin yi e Min'n bɔ Nyanmiɛn Wawɛ'n jran bé sin ti'n, be trɛ.

32Piɛr ´wlan-wlan lika kwlaa nun, le kun ɔ ɔli Nyanmiɛn i sran bɔ be o Lid lɔ'n bé wun lɔ wie.

33Ɔ toli bian kun bɔ be flɛ i kɛ Ene'n i lɔ, ɔ ti bubuwafuɛ ɔ lɛ i bɛ'n su, kɛ ɔ bubuli'n ɔ'a di afuɛ mɔcuɛ.

34Piɛr seli i kɛ: «Ene, Jésus-Krist a yo wɔ juejue, jao sɛ ɔ bɛ'n.» Nan i osu kunngba'n nun ɔ'a jao.

35Kɛ Lid nin Sarɔn lɔfuɛ'm be kwlaa be wunnin i'n, be fa bé wun mannin e Min'n.

36Jésus sɔnnzɔnfuɛ bla kun o Zope lɔ, be flɛ i kɛ Tabita. Grɛk nun'n, dunman sɔ'n yɛlɛ Dɔrkas'n, i bo yɛlɛ wannzannin. Ɔ ti klun ufuefuɛ kpa yɛ ɔ yo yalɛfuɛ'm be ye.

37Kɛ Piɛr o Lid lɔ'n, bla sɔ'n tɔli tukpacɛ, ɔ wuli, be wunnzinnin i yɛ be lɛli nglo sua ba kun nun.

38Lid mantan Zope. Kɛ Jésus sɔnnzɔnfuɛ'm be tili kɛ Piɛr o lɛ'n, be yili sran nnyɔn ɔli i sin kɛ be ko se i kɛ ɔ bla trɛlɛlɛ.

39Piɛr a sisi-mɛn i bo, ɔ nin be ɔli. Kɛ ɔ juli lɔ'n, be fɛ ɔli nglo sua'n nun lɔ. Angboti mmla'm be kwlaa be bɛli i wun lɛ, be fa tralɛ nin tralɛ dandan nga Dɔrkas wuli be kɛ i nyin tɛ o su'n, kleli i, wuun be ´sun.

40Piɛr man sran'm be kwlaa be fiteli, ɔ kotoli, ɔ koko sa sɔ'n kleli Nyanmiɛn, i sin ɔ kpɛli i nyin fuɛn'n i wun lɔ, nan ɔ'a se kɛ: «Tabita, jao!» Kɛ ɔ tikeli i nyin b'ɔ wunnin Piɛr'n, ɔ jao trannin ase.

41Piɛr utili i sa'n mɛnnin i su. I sin ɔ flɛli Nyanmiɛn sran mun nin angboti mmla mun, ɔ fɛ i kleli be kɛ ɔ'a cɛn.

42Zopefuɛ'm be kwlaa be tili sa sɔ'n, ɔ man sran kpanngban be lafili e Min'n su.

43Piɛr dili le nnyɔn kun Zope lɔ Simɔn b'ɔ ti kplo usufuɛ'n i awlo lɔ.

← Chapter 8 Chapter 10 →