2 Kings 21

Baoule (NYANMIƐN NDƐ'N 1998)

1Kɛ Manase ´yo famiɛn'n, wuun ɔ lɛ afuɛ blu-nin-nnyɔn. Ɔ trannin Zerizalɛm afuɛ ablenun-nin-nnun. I nin suan Ɛfziba.

2Ɔ yoli sa ng'ɔ yo-man Anannganman fɛ'n. Nvle nga Anannganman fuannin be nun sran mun b'ɔ fali be lika'n mannin Izraɛl'n, Manase niannin be tete sa nga be yo be'n be su yoli wie.

3Sraka yiwlɛ lika bɔ be o kpɔlɛ'm be su nga i si Ezekias bubuli be'n, ɔ wa kplannin be uflɛ. Ɔ kplannin sraka yiwlɛ mun mannin Baal, ɔ takali waka nga be sɔ'n kɛ nga Izraɛl famiɛn bɔ be flɛ i Akab'n yoli'n sa. Ɔ kotoli nglo lɔ ninnge'm bé bo, ɔ suli be.

4Anannganman dun mmua kɛnnin i laa kɛ: «Zerizalɛm wa yɛ n ´yi mín wun nglo-ɔ.» Sanngɛ Manase kplannin amuɛn sɔwlɛ mun Anannganman i sua'n nun.

5Ɔ kplannin nglo lɔ ninnge'm be sɔwlɛ mun sɛsɛsɛ mannin be. Ɔ kplannin be Anannganman i sua'n i awlo klun nnyɔn'm be su.

6Ɔ fɛli i wa'n yili tɛ nga be yrɛ i nnɛn'n kɔlikɔli'n, ɔ yili wunnzue fanunfanun mun. Ɔ lɛ i sran mun yɛ be nin wunmiɛn mun be ijɔ-ɔ. Ɔ yoli sa sunman bɔ Anannganman klo-man be'n fa fɔkɔli i anwlɛn.

7Ɔ takali waka nga be sɔ'n Anannganman i sua'n nun. Sanngɛ wuun Anannganman dun mmua seli David nin i wa Salomɔn be laa kɛ: «Sua nga yɛ n niannin n fali-ɔ, Zerizalɛm klɔ'n yɛ n fɛli i Izraɛl nvle'n kwlaa nun kɛ n ´yi mín wun nglo lɛ tititi-ɔ.

8Sɛ Izraɛlfuɛ'm be fa min mmla fanunfanun nga Moiz b'ɔ ti min sufuɛ'n fa sieli be nyrun'n su'n, n su kan-man bé bo mɛn nga n fa mannin be nannan mun'n nun. Be su wlan-wlan-man mɛn'n nun daan be sin-man kun.»

9Sanngɛ b'a fa-man ndɛ nga Anannganman kannin'n su. Manase fali be ɔli atin tɛ su, bé sa tɛ liɛ'n wa trali nvle nga Anannganman nunnunnin be mannin Izraɛlfuɛ mun'n be liɛ'n.

10I ti Anannganman fali ndɛ wlɛli i sufuɛ nga be ti i nuan ijɔfuɛ'm bé nuan. I waan be `se kɛ:

11«Kɛ bɔ Manase b'ɔ ti Zida famiɛn'n yoli tete sa mun'n, b'ɔ yoli sa bɔ be tɛ tra Amɔrfuɛ'm be liɛ'n, b'ɔ cuɛnnin Zidafuɛ mun ɔli amuɛn sɔlɛ'n,

12i ti min Anannganman bɔ n ti Izraɛl Nyanmiɛn'n, min wan yoo: ‹N wa fa nyrɛnnɛn'n n ´yi Zerizalɛmfuɛ nin Zidafuɛ'm bé su. Nyrɛnnɛn sɔ'n, sran nga be ti i ndɛ'n, bé ´kpiti kpli.

13N wa nunnun Zerizalɛm kɛ n fa nunnunnin Samari nin Akab i awlo'n sa. N wa utu Zerizalɛm'n nyin ase kɛ kpongbo bɔ be wunnzin nun wie kpɛkuun be utu i nyin ase'n sa.

14N ´yi min sa min nvlefuɛ nga be kali lɛ'n be su, n ´yi be n ´wlɛ i be kpɔfuɛ'm bé sa nun. Be kpɔfuɛ sɔ'm, be ´fɛn bé bo ninnge mun.

15Sa ti bɔ n ´yo sɔ'n, yɛlɛ kɛ, kɛ ɔ fin cɛn bɔ be nannan'm be fin Ezipt lɔ bali lele b'ɔ ´fa ju ndɛ'n, sa ng'ɔ yo-man min fɛ'n, b'ɔ kun min ya'n, yɛ be yo-ɔ.› »

16Sran nga b'a yo-man sa bɔ Manase kunnin be'n, be sɔnnin kpa. Sɛ e ´kwla se'n, sran sɔ'm be mmoja'n yili Zerizalɛm klɔ'n i bue kun lele fa kpɛn i bue kun lɔ. Sa tɛ ng'ɔ yoli b'ɔ fali Zidafuɛ mun yili nun'n, bɔ ɔ'a yo-man Anannganman fɛ i li wo i ngunmin.

17Manase i wun ndɛ'n i onga'n, ɔ nin sa tɛtɛ ng'ɔ yoli be'n, i kwlakwla ti klɛwa Izraɛl famiɛn'm bé wun ndɛ fluwa'n nun.

18Manase wuli. Be sieli i i sua'n wun lɛ fie'n nun. Be flɛ fie sɔ'n kɛ Iza i fie. Yɛ i wa Amɔn sinnin i osu-ɔ.

19Kɛ Amɔn ´yo famiɛn'n, wuun ɔ lɛ afuɛ ablaɔn-nin-nnyɔn. Ɔ trannin Zerizalɛm afuɛ nnyɔn. I nin suan Mɛsilemɛt. Ɔ ti Ariz b'ɔ fin Zɔtba'n i wa.

20Amɔn yoli sa ng'ɔ yo-man Anannganman fɛ'n, kɛ i si Manase sa.

21I si i ajalɛ kunngba ng'ɔ fali'n yɛ ɔ fali-ɔ. Ɔ sɔli amuɛn nga i si kotoli be bo b'ɔ sɔli be'n.

22Ɔ yili Anannganman b'ɔ ti i nannan'm be Nyanmiɛn'n i ase. Ɔ'a nanti-mɛn i atin'n su.

23Famiɛn Amɔn i sonja su kpɛn'm be cicili i wun ndɛ, nan b'a kun i i bɔbɔ i sua'n nun lɔ.

24Zidafuɛ'm be kusu be kunnin be kwlaa nga be cicili famiɛn'n i wun ndɛ'n, nan b'a fɛ i wa Zozias b'a sie i ja nun.

25Amɔn i wun ndɛ'n i onga'n, ɔ nin sa ng'ɔ yoli'n, i kwlakwla ti klɛwa Izraɛl famiɛn'm bé wun ndɛ fluwa'n nun.

26Be sieli i i bɔbɔ i asieliɛ'n nun. Asieliɛ sɔ'n wo Iza i fie'n nun. Yɛ i wa Zozias sinnin i osu-ɔ.

← Chapter 20 Chapter 22 →