Zechariah 8

balinese

1Ida Sang Hyang Widi Wasa Sane Maha Kuasa, mapaica pituduh ring Dane Sakaria, kadi asapuniki:

2“Ulun suba dot pesan makeneh nulungin kota Yerusaleme, malantaran tresnan Ulune ane sanget pesan teken jlemane ditu. Tresnan Ulune ento ane ngawanang Ulun duka teken musuh-musuhnyane.

3Ulun lakar malipetan ka Yerusalem, kotan Ulune ane suci, tur lakar nongos ditu. Kotane ento lakar kasambat dadi kota ane satia, tur gunung Ida Sang Hyang Widi Wasa Ane Maha Kuasa lakar dadi gunung suci.

4Ditu lakar buin ada anak odah-odah luh muah muani ane suba kaliwat tua, kanti ia matungked majalan, tur ia lakar pada negak di tanah lapang kotane.

5Buina jalan-jalane lakar buin bek misi anak cerik-cerik luh muani pada macanda.

6Mirib unduke ento tawah pabuat bangsane ane enu idup jani, nanging pabuat Ulun unduke ento tusingja tawah.

7Ulun lakar ngluputang kaulan Ulune uli di gumi tongos iane kakutang,

8tur lakar ngamulihang ia uli kangin muah uli kauh, buat nongos di Yerusalem. Ia lakar dadi kaulan Ulune tur Ulun ene lakar dadi Widinnyane ane mrentah ia saha satia muah adil.

9Entegangja kenehe! Ane jani kita pada madingehang sabda ane warah-warahanga baan paranabine, dugas dasar Perhyangan Agunge kapasang, dikalan Perhyangan Ulune buin kawangun.

10Satondene ento tusing ada anak ane mapikolih muah tusing ada ingon-ingon ane mupu, buina tusing ada anak ane luput uli musuh-musuhnyane. Ulun ngadokang anake apanga pada masogsag nglawan timpalnyane.

11Nanging ane jani sisa-sisan bangsane ane enu idup ene lakar melahang Ulun pesan ngrunguang.

12Ia lakar pada nyambeh bibitne saha sutrepti. Punyan anggurne lakar pada mabuah, tanahe lakar mesuang pamupon, tur ditu lakar cukup ada ujan. Ulun lakar maicayang sakancan mertane ene teken bangsan Ulune ane enu idup.

13Ih wong Yehuda muah wong Israel! Ane malua, wong sunantarane pada saling temah ngajak timpalne, kene pangucapne: ‘Madak cai apang katibanin bencana, patuh buka bencanane ane nibenin wong Yehuda muah Israele!’ Nanging Ulun lakar ngrahayuang kita, tur sasubane ento wong sunantarane ento lakar pada ngucap teken timpalne kene: ‘Madak cai nampi merta ane patuh buka merta ane tampina baan wong Yehuda muah Israele!’ Sawireh keto entegangja kenehe tur edaja takut.”

14Ida Sang Hyang Widi Wasa Sane Maha Kuasa, masabda sapuniki: “Dugas paraleluur kitane ngae apanga Ulun duka, Ulun ngrencanayang bencana buat nibenin ia, tur Ulun tusing ngubah pakayunan Ulune ento, nanging Ulun lakar nyalanang rencanan Ulune ento.

15Nanging ane jani Ulun ngrencanayang lakar ngamertanin wong Yerusalem muah wong Yehudane. Sawireh keto edaja takut.

16Buka kene ane patut laksanayang kita, nah ento: Pada ngraos amun sajaane ngajak timpal kitane. Di pangadilan, jalanang kadilan ane amun patutne, nah ento paundukan ane ngranayang dame.

17Edaja ngrincikang kajaatan marep teken timpal kitane. Edaja dadi saksi masumpah palsu. Ulun geting teken unduk ane bobab, ane tuara adil muah unduk kawirosan.”

18Ida Sang Hyang Widi Wasa Sane Maha Kuasa mapaica pawuwus ring Dane Sakaria, kadi asapuniki:

19“Puasane kajalanang dibulan ane kaping pat, kaping lima, kaping pitu muah ane kaping dasa, lakar dadi rerainan suka rena muah kaliangan pabuat wong Yehudane, kita patut nresnain kasujatian muah dame.”

20Ida Sang Hyang Widi Wasa Sane Maha Kuasa masabda sapuniki: “Lakar ada masane, mungguing jlemane uli makudang-kudang kota lakar pada teka ka Yerusalem.

21Anake ane uli kotane ane abesik lakar pada ngraos teken anake ane uli kotane ane lenan, kene: ‘Tiang jaga mabakti ring Ida Sang Hyang Widi Wasa Sane Maha Kuasa tur ngastawa nunas mertan Idane. Ngiringja iraga sareng-sareng!’

22Liu rakyate muah bangsa-bangsa ane mawisesa lakar teka ka Yerusalem buat nyungsung Ida Sang Hyang Widi Wasa Ane Maha Kuasa muah ngastawa nunas mertan Idane.

23Didinane ento lakar ada wong sunantara ajaka adasa nekain anak Yahudi adiri, sarwi ngucap kene: ‘Tiang sareng sami pacang negen aget lacur ragane, santukan tiang sampun miragi mungguing Ida Sang Hyang Widi Wasa ngiangin ragane.’ ”

← Chapter 7 Chapter 9 →