Psalms 80

balinese

1Duh Ratu Sang Pangangon wong Israele, pirengangja atur titiange! Duh Ratu Sang Pamimpin ingon-ingon druene, pirengangja pinunas titiange! Malinggihja Palungguh IRatu ring singasana druene sane ring duur kampid malaekate.

2Sinahangja ragan Palungguh IRatune ring suku-suku Epraime, Benyamin miwah Manase! Sinahangja kakuatan Palungguh IRatune ring titiang tur gelisangja rauh ngrahayuang titiang.

3Duh Ratu Sang Hyang Widi Wasa, waliangja titiang! Sinahangja sih pasuecan Palungguh IRatu ring titiang, sinah titiang jaga rahayu.

4Duh Ratu Sang Hyang Widi Wasa Sane Maha Wisesa, malih amunapike suenipun Palungguh IRatu jaga duka ring pangastawan parakaulan Palungguh IRatu?

5Palungguh IRatu sampun mapaica kaduhkitan makadados tetedan titiange, miwah yeh mata agelas ageng makadados inum-inuman titiange.

6Palungguh IRatu manggayang bangsa-bangsane sane ring kiwa tengen titiange pada nglurug panegaran titiange, tur meseh-meseh titiange pada minjulin titiang.

7Duh Ratu Sang Hyang Widi Wasa Sane Maha Wisesa, waliangja titiang! Sinahangja sih pasuecan Palungguh IRatune ring titiang, sinah titiang jaga rahayu!

8Palungguh IRatu sampun makta wit anggur medal saking Mesir. Palungguh IRatu sampun ngaonang bangsa-bangsa sane lianan tur Palungguh IRatu nandur wit anggure punika ring tanahipune.

9Palungguh IRatu mresihin genah wit anggure punika mentik. Akah-akahipun tumbuh dalem, tur witipun ngrempayak kantos nglikub tanahe makasami.

10Wit anggure punika ngrembun naonin bukit-bukite punika, tur carang-carangnyane naonin wit aras sane ageng-ageng.

11Carang-carangipune malipah ngantos rauh ring Segara Tengah miwah ngantos rauh ring Tukad Eprate.

12Punapi awinannya Palungguh IRatu nguug pagehan sane nyerung ipun? Sane mangkin asing-asing anak sane nglintang irika mrasidayang mamaling wohipune.

13Bawi-bawi alase pada nyekjek ipun, tur sato-sato alase pada neda ipun.

14Duh Ratu Sang Hyang Widi Wasa Sane Maha Wisesa, mawalija ring titiang! Cingakja titiang saking suargan, tur gelisangja rauh ngrahayuang kaula druene!

15Rauh tur rahayuangja wit anggur sane tandur Palungguh IRatu punika, wit sane muda sane sampun tumbuhang Palungguh IRatu ngantos ageng tur kuat.

16Meseh-meseh titiange sampun nunjel wit anggure punika tur nyepeg ipun. Cingak miwah dukainja meseh-meseh titiange punika tur sirnayangja ipun.

17Patiningin miwah sayubinja kaula seselikan Palungguh IRatu, bangsa sane sampun dadosang Palungguh IRatu kukuh bakuh.

18Titiang nenten jaga naenin malih nilar Palungguh IRatu. Banggayangja titiang urip, janten titiang jaga muji Palungguh IRatu.

19Duh Ratu Sang Hyang Widi Wasa Sane Maha Wisesa, waliangja titiang. Sinahangja sih pasuecan Palungguh IRatune ring titiang, sinah titiang jaga rahayu.

← Chapter 79 Chapter 81 →