Psalms 79

balinese

1Duh Ratu Sang Hyang Widi Wasa, bangsa-bangsane sane lianan sampun anglurug jagat druene. Ipun sampun ngletehin Perhyangan IRatune sane suci tur manggayang kota Yerusaleme uug maglaturan.

2Ipun manggayang sawan kaula druene dados tetedan paksi guak miwah paraparekan druene dados tetedan sato galak.

3Ipun ngecorang rah kaulan Palungguh IRatu waluya sakadi ngecorang toya, rahe punika membah sakadi toya nglancah kota Yerusalem, tur nenten wenten jadma sane kantun urip buat mendem sawane punika.

4Bangsa-bangsane ring kiwa tengen titiange pada minjulin titiang, tur ipun pada ngedekin miwah ngewerin titiang.

5Duh Ratu Sang Hyang Widi Wasa, punapike Palungguh IRatu jaga duka ring titiang ngantos salami-laminipun? Punapike pidukan Palungguh IRatune jaga nglantur ngeseng sakadi geni?

6Tiwakangja pidukan Palungguh IRatune ring bangsa-bangsa sane nenten nyungsung Palungguh IRatu miwah ring bangsa-bangsa sane nenten ngastawa ring Palungguh IRatu,

7santukan ipun sampun ngamademang kaulan Palungguh IRatu, tur ipun sampun nguugang panegara druene.

8Sampunangja titiang sisipanga malantaran dosa-dosan leluur titiange. Sane mangkin suecaninja titiang, santukan pangajap-ajap titiange sami sampun telas.

9Duh Ratu Sang Hyang Widi Wasa, tulunginja titiang, tur rahayuangja titiang. Luputangja titiang tur ampurayangja dosa-dosan titiange, malantaran kaluihan Palungguh IRatune ngraga.

10Punapi awinannya bangsa-bangsane punika mataken ring titiang, sapuniki: “Dijake Widin jerone?” Lugrainja titiang ngeton Palungguh IRatu nyisipang bangsa-bangsane punika, santukan ipun sampun ngecorang getih paraparekan Palungguh IRatune.

11Pirengangja geluran jadmane sane mapangkeng, tur malantaran kawisesan Palungguh IRatu sane ageng, bebasangja jadmane sane kadanda pati.

12Duh Ratu Sang Panembahan, walesangja ring bangsa-bangsane punika kantos tikel ping pitu, malantaran panyacad sane sampun ucapang ipun pamantuka ring Palungguh IRatu.

13Sasampun punika, titiang kaulan Palungguh IRatu, inggih punika biri-biri ingon-ingon druene, jaga ngaturang panyuksma ring ayun Palungguh IRatu salami-laminipun, tur muji Palungguh IRatu sapanjang masa sane jaga rauh.

← Chapter 78 Chapter 80 →