Psalms 76

balinese

1Ida Sang Hyang Widi Wasa sampun kabinawa ring Yehuda, tur parab Idane kaluihang ring Israel.

2Ida madue Perhyangan ring Yerusalem, tur Ida malinggih ring Gunung Sion.

3Irika Ida ngelung panah, tameng miwah pedang mesehe makamiwah sanjatan ipune makasami.

4Duh Ratu Sang Hyang Widi Wasa, ambate luih Palungguh IRatu, tur ambate agung Palungguh IRatu, rikala Palungguh IRatu mawali saking gunung-gunung genah Palungguh IRatune ngaonang meseh-meseh Palungguh IRatune.

5Prajurit-prajuritipune sane sura dira sami sampun kajarah, tur sane mangkin ipun pada pules tur padem. Sakancan kakuatan miwah karirihanipune sampun tan paguna.

6Duh Ratu Widin Yakube, rikala Palungguh IRatu nukain ipun, sawatek kuda miwah sane nunggang sami pada padem.

7Nanging Palungguh Ratu Sang Hyang Widi Wasa, IRatu kajerihin antuk jadmane makasami. Rikalaning Palungguh IRatu duka, nenten wenten jadmane sane mrasidayang majujuk ring ayun Palungguh IRatu.

8Palungguh IRatu ngwarah-warahang tetepasan Palungguh IRatune saking suargan. Jagate sami pada ajerih tur pada tan purun masuara,

9rikalaning Palungguh IRatu matangi jaga ngwarah-warahang tetepasan, buat ngrahayuang jadmane sane katindes ring mrecapada.

10Pedih manusane wantah ngawinang Palungguh IRatu sayan kaluihang. Jadmane sane kantun urip saking payudan jaga ngamanggehang rerainan Palungguh IRatune.

11Taurja ring Ida Sang Hyang Widi Wasa, Widin semetone, sakancan sane sampun sesangiang semeton ring Ida. Ih parabangsa-bangsa sane nampek, pada maturanja ring Ida. Ida Sang Hyang Widi Wasa ngawinang jadmane pada ajerih ring Ida.

12Ida ngasorang pararatune sane sumbung-sumbung tur ngawinang pararatune sane agung-agung rumasa karesresan.

← Chapter 75 Chapter 77 →