Psalms 75

balinese

1Titiang ngaturang panyuksma ring ayun Palungguh IRatu, duh Ratu Sang Hyang Widi Wasa. Titiang ngaturang panyuksma ring ayun Palungguh IRatu! Titiang nglumbrahang indik kagungan Palungguh IRatune, tur nuturang paindikan-paindikan sane luih sane sampun kardi Palungguh IRatu.

2Ida Sang Hyang Widi Wasa masabda sapuniki: “Ulun suba ngamastiang dina tetepasane tur Ulun lakar nepasin saha adil.

3Yadiastunja sawatek ane mangkihan pada jejeh ngetor tur gumine magejeran, Ulun lakar ngukuhang dasarnyane.

4Ulun ngorahin jadmane dursila apang eda ia mrekak.

5Ulun ngorahin ia, apanga ia suud sumbung.”

6Tetepasane punika rauhnya boya saking kangin wiadin kauh, taler boya saking kaler miwah kelod.

7Wantah Ida Sang Hyang Widi Wasa sane maraga hakim, sane ngukum makudang-kudang anak miwah mebasang sane lianan.

8Ida Sang Hyang Widi Wasa ngambel gelas ring tangan Idane, tur gelase punika bek madaging anggur pidukan Idane sane tan sipi. Ida mriokang anggure punika tur kinum antuk sakancan jadmane sane dursila. Ipun pada nginum anggure punika kantos tan magantulan angan aketelan.

9Nanging titiang nenten jaga wusan maosang indik Widin Dane Yakub, wiadin makidung ngluihang Ida.

10Ida jaga ngenyagang kawisesan jadmane dursila, nanging kawisesan jadmane sane patut jaga tansah maweweh-weweh.

← Chapter 74 Chapter 76 →