Psalms 66

balinese

1Ih parabangsa makasami, pujija Ida Sang Hyang Widi Wasa antuk suryak maliang-liang!

2Makidungja muji kaluihan parab Idane tur aturangja puji-pujian sane luih ring Ida!

3Maturja ring Ida Sang Hyang Widi Wasa, sapuniki: “Ambate becikipun paindikan-paindikan sane kardi Palungguh IRatu! Kawisesan Palungguh IRatune kalintang ageng, kantos meseh-meseh Palungguh IRatune sumungkem saha ajerih ring ayun Palungguh IRatu.

4Saananing mrecapadane pada sumuyud nyumbah Palungguh IRatu, tur ipun pada makidung muji Palungguh IRatu. Ipun pada makidung muji parab Palungguh IRatu.”

5Mrikija cingak sane sampun kakardi antuk Ida Sang Hyang Widi Wasa, inggih punika pakardin Idane sane becik ring pantaran manusane.

6Ida ngubah segarane dados daatan sane tuh, tur paraleluur iragane pada mamargi nglintang ring tukade. Malantaran paindikane sane sampun kardi ida punika iraga masuka rena.

7Ida mrentah salami-laminipun malantaran antuk kawisesan Idane miwah tansah macingak ring bangsa-bangsane sami. Ida nenten nglugrain wenten pembrontakan sane nglawan Ida.

8Ih parabangsa sami. Pujija Widin titiange tur pada aturangja puji-pujian ragane ring Ida!

9Ida sampun matiningin iraga ngantos iraga urip tur Ida nenten manggayang iraga labuh.

10Duh Ratu Sang Hyang Widi Wasa, Palungguh IRatu sampun nguji titiang. Sakadi perake kauji antuk geni, kadi asapunika taler Palungguh IRatu sampun nguji titiang.

11Palungguh IRatu sampun manggayang titiang keni jeet, tur ngenahang tetegenan sane abot ring baong titiange.

12Palungguh IRatu manggayang meseh-meseh titiange pada nyekjek titiang, tur titiang mamargi nglintangin geni miwah blabar, nanging sane mangkin Palungguh IRatu sampun makta titiang ring genahe sane rahayu.

13Titiang jaga ngaturang aturan maborbor ring Perhyangan Palungguh IRatu tur titiang jaga naur sesangin titiange ring Palungguh IRatu.

14Titiang jaga ngaturang ring Palungguh IRatu paindikan sane sampun sesangiang titiang rikalaning titiang sajeroning nandang kamewehan.

15Titiang jaga ngaturang biri-biri buat kaborbor ring pamorboran aturane. Titiang jaga ngaturang aturan banteng miwah kambing, tur andusnyane jaga malepuk munggah ka akasane.

16Ih sakancan anake sane ngluihang Ida Sang Hyang Widi Wasa, mrikija pirengang, titiang jaga nartayang ring ragane paindikan-paindikan sane sampun kardi Ida buat titiang!

17Titiang masesambatan nunas pitulungan ring Ida, tur titiang muji Ida antuk kidung.

18Yening titiang nenten lingu ring dosa-dosan titiange, Ida Sang Hyang Widi Wasa janten nenten mirengang pinunas titiange.

19Nanging sawiaktinipun Ida Sang Hyang Widi Wasa sampun mirengang pangastawan titiange, tur Ida sampun nagingin pinunas titiange.

20Titiang muji Ida Sang Hyang Widi Wasa, santukan Ida nenten nulak pangastawan titiange, wiadin ngedohang sih pasuecan Idane sane nenten rered-rered punika saking titiang.

← Chapter 65 Chapter 67 →