Psalms 65

balinese

1Duh Ratu Sang Hyang Widi Wasa, patut pisan pabuat titiang muji Palungguh IRatu ring Sion, saha naur sesangin titiange ring Palungguh IRatu.

2Santukan Palungguh IRatu ledang nagingin sakancan pangastawane. Saking milehan parabangsane jaga rauh tangkil ring ayun Palungguh IRatu,

3ulihan dosa-dosanipune. Kiwangan titiange sane ngawinang titiang kaon, nanging Palungguh IRatu ledang ngampurayang kiwangan-kiwangane punika.

4Bagia pisan jadmane sane selik Palungguh IRatu, sane bakta Palungguh IRatu ka genah Palungguh IRatune sane suci buat muponin urip. Titiang jaga kapurnayang antuk saluiring paindikan sane becik sane wenten ring purin Palungguh IRatu, inggih punika merta saking Perhyangan Agung Palungguh IRatune sane suci.

5Palungguh IRatu nagingin pinunas titiange malantaran Palungguh IRatu mapaica kamenangan ring titiang, samaliha Palungguh IRatu ngardi paindikan-paindikan sane ngangobin buat ngrahayuang titiang. Jadmane ring sakuub jagate miwah sane ring pulo-pulone sane doh, sami pada pracaya ring Palungguh IRatu.

6Palungguh IRatu ngenahang gunung-gununge ring genahnyane malantaran kakuatan Palungguh IRatu, saha nyinahang kakuatan Palungguh IRatu sane maha wisesa.

7Palungguh IRatu negdegang kuugan-kuugan segara miwah grudugan ombake. Palungguh IRatu negdegang kaributan parabangsane.

8Sakancan jadmane ring jagate sami pada angob tur karesresan ngantenang paindikan-paindikan sane ageng sane kardi Palungguh IRatu. Pakardin Palungguh IRatune ngawinang wenten suryak kabungahan saking tanggun jagate asiki ngantos rauh ka tanggunipune sane lianan.

9Palungguh IRatu nyinahang sih pasuecan Palungguh IRatune ring jagate malantaran Palungguh IRatu nedunang sabeh. Palungguh IRatu ngawinang tanahe punika gemuh landuh. Palungguh IRatu ngebekin tukad-tukade antuk toya, tur Palungguh IRatu maicayang gandum ring jagate. Kadi asapunika Palungguh IRatu mapakardi ring jagate, inggih punika:

10Palungguh IRatu mapaica sabeh sane cukup ring pategalane sane sampun katenggala, saha ngemem ipun antuk toya. Palungguh IRatu ngenyagang tanahe punika antuk tristisan toya saha ngawinang entik-entikan sane muda pada mentik.

11Ambate becik pamupon sane kadakang antuk kabecikan Palungguh IRatune punika. Kijaja Palungguh IRatu lunga, irika sami pada gemuh landuh.

12Tegal pangonane bek madaging ingon-ingon tur sampih bukite bek kalikub antuk kaliangan.

13Pategalane sami bek antuk biri-biri miwah lebake bek madaging gandum. Saananing sane wenten sami pada masuryak miwah makidung maliang-liang.

← Chapter 64 Chapter 66 →