Psalms 58

balinese

1Duh parapamrentah, punapike ragane naenin mapaica tetepasan sane adil? Punapike ragane wiakti adil nepasin jadmane sami?

2Nenten pisan kadi asapunika! Ragane wantah mikayunin paindikan sane corah, sane prasida laksanayang ragane, tur ragane ngamargiang kawiryan ring jagate.

3Jadmane corah malaksana iwang sapanjang uripipune. Ipun tansah mabaos bobab ngawit saking ipun wau lekad.

4Ipun bek ngemu upas waluya sakadi ula, tur ipun nekep kupingipune sakadi ula kobrane sane bongol,

5sane nenten nyak miragiang suaran pawang ulane, wiadin kidung tukang sulape sane dueg.

6Duh Ratu Sang Hyang Widi Wasa, lungja gigin singane sane galak punika.

7Dumadak mangda ipun sirna sakadi toyane sane membah raris nyat. Dumadak mangda ipun nyag sakadi padange sane ring lubukane.

8Dumadak mangda ipun sakadi kakule sane nyilem ring endute, dumadak mangda ipun sakadi rare sane padem wau lekad, kantos ipun nenten naenin manggihin galang.

9Sadurung ipun uning ring indike punika, ipun karit sakadi padang tur sajeroning pidukan Idane sane angarab-arab, Ida Sang Hyang Widi Wasa jaga ngampuhang ipun rikalaning ipun pada kantun urip.

10Jadmane sane patut jaga pada marasa liang rikalaning ipun manggihin jadmane sane madosa kasisipang. Ipun pada jaga masehin buntutipune antuk getih jadmane dursila.

11Rakyate jaga mabaos sapuniki: “Jadmane patut wiakti molih upah. Sawiakti pisan wenten Widi sane nepasin jagate.”

← Chapter 57 Chapter 59 →