Psalms 56

balinese

1Duh Ratu Sang Hyang Widi Wasa, suecaninja titiang, santukan titiang kagebug tur tansah kasangsaren antuk meseh-meseh titiange.

2Arahina mepek meseh-meseh titiange nglurug titiang. Akeh pisan jadmane sane mayuda nglawan titiang.

3Duh Ratu Sang Hyang Widi Wasa Sane Maha Wisesa, yening titiang rumasa ajerih, titiang suksrah ring Palungguh IRatu.

4Titiang suksrah ring Ida Sang Hyang Widi Wasa tur titiang nenten rumasa ajerih. Titiang muji Ida malantaran janji sane sampun janjiang Ida. Punapike sane prasida kalaksanayang antuk manusane marep ring titiang?

5Sapanjang rahina meseh-meseh titiange ngardi kamewehan pabuat titiang. Ipun tan mari ngrincikang asapunapi jagi antukipun nyakitin titiang.

6Ipun pada mapunduh ring genahe sane singid, tur nlektekang saananing laksanan titiange, saha ngajap-ajap jaga ngamademang titiang.

7Duh Ratu Sang Hyang Widi Wasa, sisipangja ipun, malantaran kacorahanipune. Kaonangja jadmane punika antuk pidukan Palungguh IRatu.

8Palungguh IRatu wikan kadi asapunapi meweh titiange. Palungguh IRatu eling ring yeh matan titiange. Boyake punika sampun sinurat ring cakepan druene?

9Rikala titiang nunas ica ring Palungguh IRatu, meseh-meseh titiange pacang pada makirig. Titiang uning mungguing Ida Sang Hyang Widi Wasa makadados kantin titiange.

10Inggih punika Ida Sang Hyang Widi Wasa, sane janjin Idane puji-puji titiang.

11Titiang suksrah ring Ida, tur titiang nenten pacang ajerih. Napike sane prasida kalaksanayang antuk manusane marep ring titiang?

12Duh Ratu Sang Hyang Widi Wasa, titiang jaga naur sesangin titiange ring Palungguh IRatu. Titiang jaga ngaturang aturan panyuksman titiange ring Palungguh IRatu.

13Santukan Palungguh IRatu sampun ngluputang titiang saking pati, tur miara titiang mangda titiang nenten kaon. Duaning punika titiang mamargi ring ayun Ida Sang Hyang Widi Wasa, sajeroning sinar kauripane.

← Chapter 55 Chapter 57 →