Psalms 47

balinese

1Duh parabangsa, pada andup-andupangja tangane saha masuka rena! Pujija Ida Sang Hyang Widi Wasa antuk kidung sane jangih!

2Ida Sang Hyang Widi Wasa Sane Maha Luur patut kajerihin. Ida maraga sang ratu agung, sane mrentah sakuub jagate sami.

3Ida mapaica kamenangan ring iraga marep ring bangsa-bangsane sami. Ida sane ngawinang iraga mrentah parabangsane sami.

4Ida nyelik genah pabuat iragane magumana. Iraga puniki kaulan idane sane kasumbungang miwah sane tresnain Ida.

5Ida Sang Hyang Widi Wasa munggah ka singasanan Idane. Rikala Ida Sang Hyang Widi Wasa munggah, irika wenten suryak anak mabungah-bungah miwah suaran trompet.

6Rarisangja makidung muji Ida Sang Hyang Widi Wasa. Makidungja muji ratun iragane.

7Ida Sang Hyang Widi Wasa, maraga ratu sane ngwengku jagate makasami. Pujija Ida antuk kidung!

8Ida Sang Hyang Widi Wasa malinggih ring singasanan Idane sane suci. Ida nitah bangsa-bangsane sami.

9Parapamrentah bangsa-bangsane pada paum sareng kaulan Widin Abrahame. Kawisesan Idane maweweh-weweh, langkungan ring sakancan wadua balane. Ida nitah maduluran kagungan.

← Chapter 46 Chapter 48 →