Psalms 40

balinese

1Titiang saking sabar nyantosang pitulungan Ida Sang Hyang Widi Wasa. Ida tumuli mirengang pinunas titiange tur mirengang sesambatan titiange.

2Ida ningtingang titiang saking bangbang bayane tur titiang medal saking kawahe sane ngawinang padem. Ida ngenahang titiang saha rahayu ring duur batu kaange tur ngawinang titiang luput.

3Ida nguruk titiang makidung sane anyar, kidung puji-pujian buat Widin iragane. Akeh jadmane sane manggihin paindikane puniki polih pakeling tur pracaya ring Ida Sang Hyang Widi Wasa.

4Bagia anake sane pracaya ring Ida Sang Hyang Widi Wasa, sane nenten mabalik nyumbah arca, wiadin nenten sruron ring anake sane nyungsung widi sane palsu.

5Duh Ratu Sang Hyang Widi Wasa, Widin titiange, Palungguh IRatu sampun akeh pisan mapakardi pabuat titiang. Nenten wenten anak nyamenin Palungguh IRatu! Palungguh IRatu sampun ngardi rencana sane becik-becik pabuat titiang. Titiang nenten mrasidayang ngetang punika makasami, santukan geboganipune kalangkung akeh.

6Palungguh IRatu nenten ngarsayang aturan wewalungan miwah aturan sane tios. Palungguh IRatu nenten ngarsayang aturan wewalungan sane maborbor ring pamorboran aturane, wiadin aturan pabuat panyupat dosa. Nanging Palungguh IRatu sampun mapaica kuping ring titiang buat miragiang sabdan Palungguh IRatu.

7Duaning punika titiang raris matur kadi asapuniki: “Inggih titiang kaula druene. Titah-titah Palungguh IRatu ring titiang wenten sinurat ring Cakepan Pidabdab Torate.

8Duh Ratu Widin titiange, ambate sarat titiange jaga nglaksanayang pakarsan Palungguh IRatune! Titiang ngincepang paurukan Palungguh IRatu ring manah titiange.”

9Duh Ratu Sang Hyang Widi Wasa, sajeroning paruman sakancan kaulan Palungguh IRatu, titiang nuturang orti rahayu, mungguing Palungguh IRatu ngrahayuang titiang sareng sami. Palungguh IRatu wikan mungguing titiang nenten jaga wusan nuturang indike punika.

10Titiang nenten nyepel orti karahayuane punika pabuat titiang newek. Titiang tansah maosang indik kasatiaan miwah pitulungan Palungguh IRatune. Sajeroning paruman sakancan kaulan Palungguh IRatune titiang tansah nuturang ngeniang indik kasatiaan miwah pasuecan Palungguh IRatu sane nenten rered-rered punika.

11Duh Ratu Sang Hyang Widi Wasa, titiang uning mungguing Palungguh IRatu tan mari jaga nyinahang sih pasuecan ring titiang. Sih pasuecan miwah kasatiaan Palungguh IRatu tansah jaga ngawinang titiang muponin sutrepti rahayu.

12Titiang kiter antuk kamewehan akeh pisan, kalintang akeh kantos nenten sida ketang. Dosa-dosan titiange sampun nguber titiang, tur titiang sampun nenten mrasidayang malih ngeton. Dosa-dosane punika akehan ring bok titiange sane ring tendas titiange, tur kawanenan titiange sampun sirna.

13Duh Ratu Sang Hyang Widi Wasa, luputangja titiang! Tulunginja titiang sane mangkin!

14Dumadakja jadmane sane mamanah ngamademang titiang mangda kaon tur bingung. Dumadakja jadmane sane liang ngeton kamewehan titiange, mangda pada mabalik tur nandang kimud.

15Dumadakja jadmane sane minjulin titiang pada katengkejutang antuk kakaonanipune.

16Dumadakja sakancan jadmane sane nangkil ring ayun Palungguh IRatu pada liang tur masuka rena. Dumadakja sakancan jadmane sane nganyuksmayang karahayuan paican Palungguh IRatu punika setata jagi mabaos sapuniki: “Ambate agungne Ida Sang Hyang Widi Wasa.”

17Duh Ratu Sang Hyang Widi Wasa, titiang puniki lemet tur tiwas, nanging Palungguh IRatu sampun nenten nglaliang titiang. Palungguh IRatu maraga juru rahayu miwah Widin titiange. Gelisangja nulungin titiang!

← Chapter 39 Chapter 41 →