Psalms 39

balinese

1Titiang mabaos sapuniki: “Titiang jaga tangar ring paindikan sane laksanayang titiang, tur titiang nenten manggayang bungut titiange ngardi dosa. Titiang nenten jaga mabaos punapa-punapi rikala jadmane corah nampek ring titiang.”

2Titiang jaga mendep tur nenten mabaos angan abuku yadiastun ngeniang paindikane sane becik! Nanging kasangsaran titiange sumingkin mangetang,

3tur titiang sampun kakaonang antuk kasumangsayane. Sumingkin titiang mapineh, titiang dados sayan meweh, kantos wetu pitaken kadi asapuniki:

4“Duh Ratu Sang Hyang Widi Wasa, malih amunapi suenipun titiang jaga urip? Malih pidanke titiang jaga padem? Nikayangja ring titiang malih pidanke urip titiange pacang puput.”

5Ambate cutetne Palungguh IRatu ngardi urip titiange. Ring ayun Palungguh IRatu, tuuh titiange nenten wenten pituasipun. Sujatinipun sakancan manusane sane urip tan bina sakadi ampehan angine,

6tur tan bina sakadi lawate. Saluiring sane laksanayang ipun nenten wenten pikenohipun. Ipun munduhang kasugihan, nanging ipun nenten uning sapasirake sane jaga namiang punika.

7Duh Ratu Sang Hyang Widi Wasa, duaning punika punapike sane nyandang ajap-ajap titiang? Titiang ngaturang pangajap-ajap titiange ring ayun Palungguh IRatu.

8Rahayuangja titiang saking sakancan dosa-dosan titiange, tur sampunangja banggayanga jadmane nambet ngedekin titiang.

9Titiang jaga mendep. Titiang nenten jaga mabaos angan abuku, santukan Palungguh IRatu ngraga sane ngawinang titiang nandang sangsara sakadi sapuniki.

10Sampunangja titiang malih sisipanga! Titiang tambis-tambis padem malantaran lempag Palungguh IRatu.

11Palungguh IRatu nyisipang dosan manusane antuk pidukan Palungguh IRatune, tur waluya sakadi ngetnget Palungguh IRatu nyirnayang sakancan paindikan sane tresnain ipun. Sujatinipun, manusane punika tan bina sakadi angine.

12Duh Ratu Sang Hyang Widi Wasa, pirengangja pangastawan titiange, tur pirengangja sesambatan titiange. Rarisangja rauh nulungin titiang rikalaning titiang ngeling. Sakadi leluur titiange, titiang dados tamiun Palungguh IRatu wantah ajebos pisan.

13Banggayangja titiang iriki newek mangda titiang prasida muponin bagia akidik, sadurunge titiang makaon tur titiang nenten kantun malih.

← Chapter 38 Chapter 40 →